All India Junior Ranking Badminton Tournament C. Lalramsanga'n bronze a hlawh chhuak

Yonex-Sunrise All India Junior Ranking Badminton Tournament 2024-ah C. Lalramsanga chuan bronze medal a hlawh chhuak a, Durtlang rawlthar hian Delhi lam mi Bhavya Chhabra nen ṭang dunin, Under-19 boys doubles category-ah bronze hi an hlap chhuak a ni.

Bhubaneswar, Odisha-a neih inelnaah hian Sanga leh Chhabra te hian seeded no. 3 ni chungin inelna an hmachhawn a, round of 32-ah Jayakrishna CV leh Mithes R. te ṭangdun chu 21-16, 21-8 a hneh nghalin, round of 16-ah Varghese JK leh Aman Suresh SM. te ṭangdun chu 20-22, 21-11, 21-15 in, deciding game-ah an hneh zui.

Quarter final-ah seeded no 5 Nagesh Chamle leh Jayesh H. te inkawp pawh deciding game-ah tho, 9-21, 21-7, 21-13 in an hneh leh a, beiseina a sang hman hle. Mahse, semifinal-ah hian he tournament-a seeded no 2 Arsh Mohammad leh Shaskar Saraswat-te hmachhawnin, chak mai beiseina pawh awm hman mah se, 21-11, 20-22, 14-21 in a tlawm zawkah an ṭang.

Sanga hi Badminton Association of India (BAI) in a din, National Centre of Excellence, Guwahati a badminton training lai a ni a, tuna a medal hlawhchhuah hi national level-a bronze medal a lak vawi hnihna a ni.

August 1, Ningani aṭang khan inelna hi neih ṭan niin, nimin khan a zo. Mizo shuttler dang inlan zingah H. Lalṭhazuala'n quarterfinal a thleng. Seeded no 9 ni chunga inlan Ṭhazuala hi U19 boy's singles category-ah inlanin, seeded no. 3 Neer Nehwal hial vaw tla mah se, quarterfinal-ah a zinkawng a tawp.

U17 player Sainunmawia Sailo chu mixed doubles-ah Ishita Negi nen ṭangdunin, pre-quarter final an thleng. C. Lalramsanga leh Lalrempuii te chu mixed doubles-ah vek inlanin, round of 16 an inhlangkai thei a, Lalrinkimi chuan U19 girl's singles category -ah main draw a invawkai bawk.

All India Junior Badminton Ranking Tournament 2024 hi September 30 - October 13, 2024, Nanchang, China-a neih tur, BWF World Junior Championships-a tel thei tur zawnna pakhat a ni a, singles inelnaa quarterfinal lut chin leh doubles category-a semifinal khel pha chinten final seclection trial, New Delhi-ah an hmachhawn thei dawn a, Sanga leh Ṭhazuala te pawhin August 10-13 inkara neih tur trial hi an hmachhawn ang.