AFC an kal fawr; Police tan Michael

GIG Motors I Day Football 2024-ah Aizawl FC-in team ṭha bik an nihzia an pholang zel a, I League club hian nimin inkhelah FC Bethlehem 4-0 in an sawp. Victor Lalbiakmawia hote hian match thum aṭanga point kua hmuin semifinal an lut.

Group B inkhel hnuhnung zawkah Mizoram Police-in injury time-a substitute Michael Lalbiaksanga goal hmangin NorthEast United reserves 1-0 in an hneh a, Lalbiaksanga Colney hote hi Aizawl FC hnung zui turin an dinhmun a ṭha hle.

BD-a Show

Aizawl FC-in season ṭha tak an hmang a, player che ṭha rual zingah Champhai Zotlang tlangval Lalbiakdika a langsar. BD-a hian MPL11-ah goal nga a khung tawh a, I Day Football-ah che ṭha lehzualin match thum aṭangin goal ruk a khung.

BD-a hian a club hlui Bethlehem lakah first half tawp dawn leh second half tirah a khung a, tlarhnung ven him tuma theihtawp chhuahtu FCB pawhin dan ngaihna an hre lo a ni ber. Augustine Lalrochana'n minute 56-naah a khung belh a, Vairengte tlangval Augustine hian mahni hma sial lo takin injury time-ah RH Laltlanhlua goal khung tur a siamsak bawk.

Police nge nge

Mizoram Police-in NE United Reserves lakah team ṭha zawk an ni tih lantir mah se goal khung an harsat. First half-ah Malsawmfela'n goal ban a pet per a, Lalfakzuala, F. Lallawmkima leh FC Lalhmunmawia ten chance ṭha an khung lo vek.

NE United reserves fitness a ṭha a, Police tan an awlsam lo. Chutihrualin NE United rawlthar rual hi tlarhmaah an hriam bik lo. Second half-ah pawh Police thoin chance ṭha an nei a, H. Lalbiakthanga'n hnai tak aṭangin a khung lo. Coach BS-a'n vanneih beiseiin Zaithanmawia leh Michael te bench aṭangin a luhtir a, a tifuh hle.

Injury time-ah NE United reserves goalkeeper-in box chhungah ball a man nghet thei lo a, a per hi Zaia'n goal lamah tiperin Tlangmawi tlangval Michael-a'n goal-ah a chantir. Police hian goal khung tlai mah se awlsam takin an chak lo. Referee-in hun tawp ham rik a ham hma chiahin NE United-in goal ban an tihper a, Police an him hram.