Sihphir Venghlun Vs Ramhlun Athletic

GIG Motors I Day Football-ah vawiin tlai dar 3:30 hian Sihphir Venghlun FC leh Ramhlun Athletic FC te an inkhel dawn a, group stage match hnuhnung ber ni mah se a chak zawkin semifinal an luh dawn avangin quarterfinal anga chhiar theih a ni.

Group A inkhel dangah SYS FC leh Bethlehem Vengthlang te an inkhel dawn a, chhun dar 12:00-a inkhel turte erawhin point an la hmuh loh avangin a pawimawh a awm tawh lo.

A hmuhnawm dawn

Sihphir Venghlunin Chanmari FC an hneh lo a, Ramhlun Athletic-in Lalsangzuala Hmar hote lakah point an hmuhchhuah avangin Danny Lalduhawma hote hi an dinhmun a ṭha hret. Ramhlun tan pahnihna ni chunga semifinal lut turin draw a tawk a, chutihrualin pakhatna nih an duh chuan chak a ngai thung.

Sihphir Venghlun tan erawh chak ngei a ṭul a, hei hian inkhel a tihhmuhnawm phah sawt ang. MPL11-ah Sihphir Venghlun hian Ramhlun hi 3-2 in an hneh tawh a, inringtawkna an ngah phah sawt ang. An intawn hmasak ṭum hian Ramhlunin Richard Lalramnunpuia leh Michael te hmangin khung hmasa mah se SVFC-in PC Lalruatsanga goal hnih leh Lalawmpuia goal hmangin an lehthal.

Rawng ṭha ser dawn

Sihphir Venghlunin chak an mamawh tih an hria a, an ṭhat dan bera an hriatin an khel dawn. Coach Robert Laldinthara chuan, "Rawng ṭha ser a, nawr kan ngai. Keini tan chuan chak ngei a ngai a, chumi tur chuan huaisen takin kan khel ang," tiin Vanglaini a hrilh.

SVFC tlarhma tichaktu PC Lalruatsanga, Lalawmpuia leh Malsawmtluanga ten bul an ṭan vek dawn a tih theih. PC-a hian MPL11-ah goal li khung tawhin, heng zinga goal hnih hi Ramhlun lakah a khung a ni. I Day Football-ah pawh match hnuhnung bera SYS FC an hneh ṭumin goal a khung bawk.

Ramhlun Athletic pawhin goal venhim ringawt an tum dawn lo. Coach Danny Lalduhawma chuan, "Draw-in semifinal lut thei tih inhre mah ila, draw tuma inkhelh nghal kha a him lo. Draw tuma kan khelh chuan a dawih zawk kan ni a, chuvangin chak tumin kan khel dawn. Ṭum danga kan khelh dan pangngai angin kan khel ang," tiin a sawi.