Match hmasa berah Srikanth a chak

Hun rei tak an chawlh hnuah badminton inelna pawh neih ṭan a ni leh ta, India tlangval Kidambi Srikanth chuan Denmark Open a match hmasa berah Toby Penty chu straight game in a hneh.

Thla sarih chhung ngawt chu Covid-19 vangin inelna a awm thei lo. March thla a khelh All England hnuah Denmark Open hi tournament an khelh leh hmasa ber a ni, world number 1 hlui hian a thiam a la theih nghilh chuang lo - Britain player hi minute 37 chhungin 21-12, 21-18 in a hneh.

Seeded pangana Srikanth hian a match lehpekah chuan Indian player Subhankar Dey leh Canadian tlangval Jason Anthony Ho-Shue inkhela chak zawk a hmachhawn leh ang, inkhel dangah Lakshya Sen chuan harsa lo takin Christo Popov a lo hneh ve bawk.

Badminton World Federation zawhna chhangin Srikanth chuan, "Hun rei tak hnua tournament khel leh chauh kan nih avangin chona thar a ni, game khatna ka khelh fuh nghal avangin ka vannei zawk.

"Inelna ka hma-chhawn hnuhnung ber chu All England daih tawh kha a ni, khami ṭum khan hneh nei loin ka tla. Tunah erawh hnehna nen bul ka ṭan thei a, hei hian inrintawkna min siamsak belh ngei ang," tiin a sawi.