A zawna vawi nga champion Lopez!

Cuban wrestler Mijain Lopez chuan mellung hlu bik a phun - infiammi zingah a zawna Olympic vawi nga a gold medal la thei vek a ni a, a sulhnu hian hriatreng a hlawh tawh ang.

Lopez hian tun thla laihawl huan kum 42 a tling dawn, chutiang chung chuan 130kg Greco-Roman category-ah amah tluktu an la awm thei chuang lo, gold medal inchuhnaah Chile tlangval Yasmani Acosta Fernandez chu 6-0 in a hneh.

Tun hma chuan a zawna vawi li gold medal la thei hi an awm nual - Lopez bakah hian Carl Lewis (athletics/long jump), Michael Phelps (swimming/200m medley), Katie Ledecky (swimming/800m freestyle), Al Oerter (athletics/discus), Paul Elvstrom (sailing) leh Kaori Icho (wrestling) ten record inṭawm an chelh ṭhin.

Mahse, tunah chuan Lopez hian a tlukpui dang zawngte hi a kalsan ta a, midang tluk rual lohin infiamna ngai hlirah a zawna Olympic gold medal la thei hmasa ber lawh awmchhun a ni.

Lopez hi a chawl lailawk deuh reng a, kum thum hnuah a inchai ve leh chauh - final kalkawngah hian world champion Amin Mirzazadeh pawh a hneh, khawvelah a ṭha ber a ni tih a pho lang chiang hle.

Hmeichhe freestyle 68kg event lamah United States mi Amit Elor-i chuan Kyrgyzstan infiammi Meerim Zhumanazarova hnehin gold medal a hlawh chhuak ve bawk.