Germany lakah India chak lo

India mipa hockey team chuan an tum ram an thleng zo lo. Germany lakah 3-2 in an chak loh avangin Paris Olympic 2024 semifinal-ah an tla a, bronze medal match erawh an la hmabak dawn a ni.

Semifinal lehlamah Netherlands chuan Spain lakah 4-0 in hnehna an lo chang ve bawk. India leh Spain hian vawiin tlai dar 5:30 hian pathumna dinhmun an inchuh zui ve leh ang.

Thawhlehni zan khan Yves du Manoir Stadium-ah India lamin captain Harmanpreet Singh hmangin goal an nei hmasa, minute sarihna lekah goal an khung - mahse Germany lamin Gonzalo Peillat (18’) leh Christopher Ruehr (27’) te hmangin a chhanglet.

India hian Sukhjeet Singh (36’) hmangin an sut ve leh a, ram pahnih te 2-2 in an inhnehtawk mai dawn ni pawhin a lang hman. Mahse, hun tawp dawnah Marco Miltkau chuan German team chakna goal a khung a, final an lut.

Mipa hockey hi India-in medal a beisei ngamna zinga mi a ni a, pathumna tal nih an tumruh hle ang. Chutihrualin, an khingpui tur Spain hi team ṭha an nih avangin medal awrh phak tur chuan hna a hautak dawn a ni.