Pre-season hmang ṭha lo Chelsea an buai

Chelsea manager Enzo Maresca chuan an tlarhnung pawp chu ngaihtuahna sen ṭhat ṭula a hriat thu a sawi a, season thar atana inpuahchah mek Chelsea hian beisei ang result an la nei thei lo.

Blues hian an pre-season match hnuhnung berah nimin khan Real Madrid chu 2-1 in an ngam lo a, Real tan Lucas Vazquez leh Brahim Díaz-ten goal khungin, Blues tan Noni Madueke chuan goal khat a khung ve bawk.

Chelsea hian August 18-ah Premier League match hmasa ber khel turin champion lai Manchester City an mikhual dawn a, August 11, Pathianni zanah hian pre-season match hnuhnung ber chu Inter Milan nen an khel leh phawt ang.

Coach thar Maresca hoa season hmachhawn tur Blues hian pre-season-ah match nga khel tawhin vawi khat chiah an la chak a, tun dinhmun aṭanga teh chuan London club ṭantute tan season thar a nghahhlelhawm lo.

Beisei phak lo

Maresca-a'n Blues-ah a khelh dan system phum a tum a, tun thleng chuan a la hlawhtling lo. Pre-season match ngaah goal 12 ngawt an chhuah a, goal kua an khung thung - goal khung chu an thei mai a, tlarhnung a nghet lo.

League One club Wrexham nen 2-2 a inhnehtawk kha pre-season mah ni se, Blues tan mualphona a ni a, Scottish champion Celtic chuan a hnu lawkah 4-1 in an sawp zui. Maresca-a'n lu thak lo pui hiah bak tihtheih a nei rih lo.

Chelsea hian Club America chu 3-0 in hneh ve zuk mah se, Manchester City lakah 4-2 in an tlawm zui a, nimnin khan Real Madrid chu 2-1 in an ngam lo leh bawk. Tunlai chu Chelsea chanchin ziah apiangin an goal chhuah thu ziah tel zel a ngai!

US-ah Chelsea hian pre-season tour an nei a, Real laka an tlawm leh tak avangin US-ah hian vawi khat chiah an va chak ve tihna a ni a, Premier League club liana inchhal tan chuan, pre-season mai mah ni se, zah vanga hmai hupna tham a ni.

Kan chhuah hnem!

Season hmasa khan Chelsea hian league-ah goal 63 ngawt an chhuah a, an club record duhawm lo tak an siam. Season tawp lamah coach Mauricio Pochettino hoa insiamremin, an zia chho a, mahse, Argentine coach system an bel dawn chauh tihah an inṭhen leh si.

Maresca hoin system thar bel an tum a, an la tihleithei meuh lo a ni ber. Chelsea boss Maresca chuan, "Team nena meeting kan neih hmasak ber chu, season hmasa lama defensive line sang lutuka goal kan chhuah hnem chungchang a ni.

"Engtik aṭangin nge defensive line sang lutuk hian kan khelh ṭan ka hre lo a, tunah chuan hei hi tawlh hnun hret kan tum. Season hmasa khan he buaina avang hian goal tam tak kan chhuah tawh a, kan siam rem thuai ka beisei," a ti.

Maresca chuan an pre-season match chu training session anga an hman thu a sawi a, City nen an inhmachhawn hmaa an buaina an chinfel hman tur thu a sawi tel - kan hre thuai dawn e.

Striker mamawh

Maresca-a'n tlarhnung buaina a sawi rualin tlarhma lama an hriam tawk lohna pawh sawi hmaih theih a ni lo - pre-season match nga zinga match li chu kum 18 mi, Barcelona aṭanga pound maktaduai ngaa lakluh Marc Guiu chuan bul a ṭan vek.

Guiu hi player theihna nei sang tak ni mah se, tlarhmaa club lian rinrawl tur chuan a la hriam tawk lo. Nicolas Jackson-a'n club training a zawm ve leh chiah a, Romelu Lukaku leh Armando Broja te chu dam ṭha mah se, nipuiah an chhuah a rinawm.

Blues tan striker rintlak tia sawi theih chu Christopher Nkunku chiah a awm rih a, City, Arsenal, Liverpool leh Manchester United-te nena inel tur chuan Chelsea-in striker class an lak belh a ṭul.

London club hian Samu Omorodion lak tumin Atletico Madrid an dawr mek a, mahse, kum 20 mi chauh a la nih avangin rinrawl tur chu a ni lo ang - Napoli striker Victor Osimhen hming pawh lam rik a ni.

Osimhen maw?

Chelsea hian tlarhma rinrawl turin Osimhen an duh nia sawi a ni a, mahse, Italian club hian an striker man zat atana an chhiar £113mtd chu vawi khat peka tlak nghal vek tura amah duhtu club-te an beisei avangin a harsa dawn.

Kum 25 mi forward hian kar khatah £250,000 tal hlawh a duh nia sawi a ni bawk a, heng zawng zawng hi Blues tan inhuam a ngai. Chutihrual chuan kawng tiawlsam thei pakhat a awm a, chu chu Lukaku a ni.

Napoli hian coach thar Antonio Conte hnuaiah season thar an hmachhawn dawn a, Chelsea coach hlui Conte hi Lukaku duhtu a ni. London club hian an striker hi Osimhen lakluh nana Napoli chil tiputtua an hman thiam chuan man to lutuk loin an inla lut thei ang.

Nigeria tan vawi 35 inlana goal 21 khungtu Osimhen hian Napoli tan inelna hrang hrangah match 133 khela goal 76 khungin, assist vawi 18 a nei a, 2022-23 season khan Serie A nomawi a chawipui bawk.