Hammers midfielder thar Rodriguez

Nipui transfer-ah West Ham an chet nat chhunzawm zel a, Premier League-ah a tikimtu mai nih an tum lo - Argentina midfielder Guido Rodriguez chu free transfer-in an la lut a, kum hnih chhung atan contract a ziak.

Kum 30 mi midfielder hian Real Betis-ah a contract hmang zoin, a duh lam club pan tura zalenna a nei a, London club pan a thlang. Ram tan vawi 30 inlan tawhin, World Cup leh Copa America (2) nomawi a chawi tawh a, a tawnhriat ringawt pawh hi chhawr tham a ni.

Real Betis tan kum li leh a chanve a khelh chhungin Copa del Rey nomawi kum 2022 khan a chawipui a, inelna hrang hrangah match 173 khelhsakin, goal kua a khung a, assist vawi li a nei.

Rodriguez chuan, "Premier League-a khelh hi chu footballer zawng zawng duhthusam a ni a, West Ham-in min duh tih ka hriat khan ka phur hle. Club sulhnu nei ṭha tak, hmachhawp pawh nei ṭha tak an ni a, a hunah tak ka club zawm tur tak ka zawm niah ka ngai - hma kan sawn zel ka beisei," a ti.

River Plate-a a professional zinkawng zawh ṭantu Rodriguez chuan, Mexican club Club America-a a khelhpui ṭhin, West Ham leh Mexico midfielder Edson Alvarez chu Hammers a pan hmaa a rawn phawt thu a sawi bawk.

West Ham hi tun nipuiah an che na hle - Julen Lopetegui kaihhruaina hnuaia hmasawn tumin pound maktaduai 100 chuang ngawt tun nipuiah an seng tawh a, Rodriguez bakah hian goalkeeper Wes Foderingham chu free transfer-a an lakluh a ni a, a bak zawngah an inseng na hle.

Germany striker Niclas Fullkrug (£27mtd), Wolverhampton Wanderers captain Max Kilman (£40mtd), Palmeiras winger Luis Guilherme (£25.5mtd) leh Leeds United forward Crysencio Summerville (£25mtd) te lakluh nan an inseng nual tawh a, Manchester United full back Aaron Wan-Bissaka leh Aston Villa forward Jhon Duran te an la hel bawk.