Barcelona-in Olmo la lut dawn

La Liga club indinthar tum mek Barcelona-in sum lama harsatna la tawk reng mah se, an mit it zawng an hlah phah lo - RB Leipzig aṭanga Dani Olmo la lut turin German club hi a thu phungin inremna an neihpui tawh a, tun kar tawpah chuan engkim tihfel hman beisei a ni.

Olmo hian kum thum atan contract la nei mah se, Leipzig hian man man zawka hralh theih a nih laia chhuahtir mai an hnial lo a, Barcelona hian an club academy-a inzir ṭhin player lakluh nan hian euro maktaduai 60 an theh chhuak ang.

Barcelona sporting director Deco leh coach thar Hansi Flick te chuan Olmo hi an duh hle nia sawi a ni a, tlarhma khawi hmunah pawh chhawr theih a nihna lai chu Catalan club hian an duh zual phah niin an sawi.

Kum 26 mi Olmo hian La Masia-a a inzir hnuah, Croatian club Dinamo Zagreb a zawm a, January 2020 khan RB Leipzig a zawm. Bundesliga club tan hian inelna hrang hrangah match 148 khelin, goal 29 a khung a, assist vawi 34 a nei.

Season hman zawh takah khan match 25 khela goal riat khungin, assist vawi nga a nei a, Euro 2024 khelh zawh takah khan top scorer zingah telin, team of the tournament-ah a lang phak bawk.