Dumfries-a'n contract thar ziak duh lo

Manchester United nena sawizawm hlawh mek Denzel Dumfries chuan Inter Milan-ah contract thar a la ziak duh rih lo a, Dutch wing back hian Manchester United lama kal a tum niin khawthlang media-te chuan an tarlang.

United chuan an full back Aaron Wan-Bissaka chu Old Trafford aṭanga chhuahtir tumin hma an la mek a, West Ham-in rim ngawrh viau mah se, mimal thilah an la inrem thei lo - Wan-Bissaka a chhuah chuan United hian a thlaktu tur melh an tum a, Dumfries hming a ri tel.

Hetihrual hian Wan-Bissaka an hralh a nih pawhin United hian Bayern Munich full back Noussair Mazraoui an duh ber nia sawi a ni a, chutihrual chuan Bissaka hian Hammers aia Inter pan a duh avangin Dumfries hi an indawrna tiawlsam tura United pan ve thut thei reng a ni.

Kum 28 mi Dumfries hian season hman zawh takah khan Inter Milan chu Serie A nomawi chawipuiin, inelna hrang hrangah match 36 a khel a, goal li khungin, assist vawi ruk a nei.