Oranje tan Van de Beek

Bergamo-ah Italy-in Netherlands an mikhual a, 1-1 in an inhnehtawk. Nations League inkhelah hian Azzuri hi team ṭha zawk an ni a, Lorenzo Pellegrini hmangin hma hruai mah se Donny van de Beek-a'n Netherlands siphurh a sut.

Italy-in an nawr bet nghal a, minute 16-naah Inter star Nicolò Barella through ball tawih zet chu Roma midfielder Pellegrini-a'n a khung. Azzuri-in chance an neih chhunawm a, amaherawhchu Van de Beek a rawn lang a, Manchester United midfielder hian box chhung buai karah kawh zetin a pet goal.

Team pahnihin chak tumin an khel a, goal erawh  a luh belh lo. Oranje hi coach thar Frank de Boer hnuaiah match thum khel tawhin chak an la nei lo a, Nations League hmasa berah final lut mah se tun ṭumah erawh pathumnaah an awm mek avangin finals lut turin hmabak a harsa tawh khawp ang. 

Netherlands coach Frank de Boer chuan, "Defender panga kan dah chhan kha goal venhim duh vang lam ni loin kan tlarhma te kha an tlan let reng a ngaih loh nan a  ni," tiin an khelh dan hmang a sawi fiah. De Boer hian Ronald Koeman a thlak a, match thumah chak an la neih loh avangin a dinhmun a ṭha lo hle.

Italy erawh point ruk hmuin pahnihnaah awm mah se an match hnuhnung pahniha Poland leh Bosnia-Herzegovina te an hneh theih chuan group hmahruaitu an ni dawn. Italy coach Roberto Mancini chuan, "Attacking football kan khel a, team pahnihin chak kan tum ve ve avangin inkhel hmuh-nawm tak kan pho chhuak," tiin an khelh danah a lungawi thu a sawi a, chance an insiam hnem zawk thu a sawi lang bawk.