Tlai ni nemah Mizoram Police FC Vs Aizawl FC

GIG Motors I Day Football-ah vawiin tlai dar 3:30 hian MPL10 champion Mizoram Police FC leh I League club Aizawl FC te an inkhel dawn a, football hmuhnawm thlir tur a awm ang. Group B inkhel dangah vawiin chhun dar 12:00 hian NorthEast United leh Chawnpui FC te an inkhel dawn bawk.

Police an chuai?

Mizoram Police hi MPL10 champion an ni a, tun hma zawnga Mizoram football tehfung an ni. Chumi awmzia chu, Police hi team ṭha ber an ni a, team dangin an ṭhat leh ṭhat loh chu Police laka an result aṭangin an hre ṭhin.

MPL awm hnuah erawh Police-in inelna thunun an harsat. MPL ṭantirh lamah tuna an player ṭhate hi la naupang mah se club dangin foreigner an neih avangin an ṭha fal tawh lo. I League club Aizawl FC laka an player ṭha F. Lalrinpuia leh Lalbiakhlua te loan hmanga an khelh chhuahtir avangin an relegate phah hial bawk.

Tun hnuah AIFF-in state league-ah foreigner lak an phal lo a, mahse Police player ṭhaten chuai lam an pan tawh. Police innghahna ṭhin midfielder rorum Lalṭanpuia (Ṭ-a) leh keeper thlawk thei (?) Vanlalhriata te an chawl tawh a; F. Lalrinpuia, Lalbiakhlua (Biaktea), R. Malsawmtluanga, Lalfakzuala leh Malsawmfela te pawhin hun rei an nei tawh lo.

Chutihrualin hei erawh kan hriat tel tho a ngai. Lalbiaksanga Colney hote hian an vanglai pawha an tih theih loh, nomawi hlu bik pahnih an chawi. All India Police Meet-ah a vawi khat nan an champion bakah Mizorama football inelna sang ber MPL-ah an champion bawk.

AFC an hliam!

Police-in I Day Football hma MPL match hnuhnung berah Aizawl FC an hmachhawn a, an mualpho. BS-a Colney hoten F. Lallawmkima hmangin goal khung hmasa mah se AFC-in Lalbiakdika (BD-a) hmangin first half-ah vek an sut. Second half-ah BD-a'n goal hnih khung belhin, hattrick a siam a, Augustine Lalrochana'n injury time-ah khung belhin Police an zawr.

I League club laka an mualpho hnuah Police player-te ben harhin an awm a, chak loh hrehawmzia an hre thar a, rilrua chak duh ringawt loin thawhrimna a rawn tel chho ta bawk. I Day Football-ah Police-in FC Bethlehem leh NorthEast United te hmachhawn tawhin an chak ve ve a, hun tawp thlenga theihtawp an chhuah vang chauha chak ve ve an ni.

I Day Football-ah hian goal difference aia head to head a pawimawh zawk avangin Police hian hnehna an chang a nih chuan hmahruaitu an ni thei dawn a, chuvangin BS-a hote final kawng nuam zawk zawh theih nan chak ngei an tum ang.

Police ṭha zawk

Mizoram Police-in Aizawl FC an hneh loh chhan lian tak chu, coach BS-a'n second half-a substitution a siam sual vang a tih theih. Tunah erawh Police-in an tihsual an hria a, Aizawl FC khelh dan an thiam tawh ang.

Police coach BS-a Colney chuan, "Kan chak loh chhanah khan kan tihsual tam tak a awm. Aizawl FC ṭhatna kan hria a, chumi tur chuan player kan rem dawn. Chak ngei kan tum dawn a, chumi tur chuan player kan rem ang," tiin Vanglaini a hrilh.

MPL-a Police-in AFC an hneh loh ṭumin goalkeeper F. Lalmuanawma a inlan thei lo a, vawiinah erawh a khel thei tawh dawn. I Day Football aṭangin Mizoram defender FC Lalhmunmawia'n team a rawn zawm a, Police tlarhnung a phui sawt - Aizawl FC lakah fiahin an awm ang.

Team ṭha ber AFC

I Day Football-ah team 10 an tel a, group pahnihah ṭhen hran an ni chungin Aizawl FC an khel ṭha ber tih erawh a chiang. Group stage-ah Aizawl FC chu team ṭha ber an ni a, MPL-a Police an sawp ṭum aiin an ṭha tawh zawk.

I League club hian match thum lek aṭangin goal 15 an khung a, goal khat mah an chhuah lo. AFC-in Samuel Lalmuanpuia an neih hnuah winger-ten ball an hmu ṭha lehzual a, Shillong Lajong leh Mohammedan SC player hlui hi danglamna thlentu zinga mi a ni.

Tlarhnungah ISL emerging player of the league pawh ni tawh Lalruatthara an neih belh a, Hmunhmelṭha tlangval hian match fitness la nei ṭha tawk lo mah se a theihna anga a khelh theih chuan Covid-19 hnua Aizawl FC nomawi chawipui theitu a ni thei ang.

Chutihrualin tun dinhmuna Aizawl FC ṭhatna ber erawh mual sir lamah a ni a; BD-a, Augustine, Laltlanzova leh Sawma Tlangte hi defender-te mangchhia thlentu an ni. AFC coach Victor Lalbiakmawia chuan, "Chak tluan laia player thlak hi ṭha ka ti lo. Semifinal lut tawh mah ila, min chakpui thei tur player kan luhtir dawn. Police hi hneh ngei kan tum," tiin Vanglaini a hrilh.

Aizawl FC-in goal 15 ngawt khung tawh mah se an striker-ten an khung tam tawk lo a, hemi chungchang hi sawiin Victor chuan, "Kan striker te hi goal aṭangin ka teh lo. An thawkrim em em a, kan winger-ten goal an khung theihna chhan a ni. Team chhung boruak a ṭha a, player-te iner ni loin an inel a, chuvangin starting XI thlan pawh a har a, kan buaina hi a ṭha lam a ni," tiin Vanglaini a hrilh.