Ramhlun Athletic tana lawmna thlentu Flavius

GIG Motors I Day Football-ah Ramhlun Athletic tla thei dinhmunah an ding a, Sihphir Venghlun laka 2-1 a an hnufual laiin Flavius Lalruatkima a rawn lang. Bairabi tlangval hian goal hnih khungin semifinal-ah Ramhlun a hruai thleng.

Nimin tlai RG Stadium-a inkhelah football hmuhnawm bik chhawpchhuah a ni a, Ramhlun Athletic leh Sihphir Venghlun te 3-3 in a inhnehtawk. Danny Lalduhawma hoten Chanmari FC hnung zuiin group A aṭangin semifinal an lut.

Bethlehem Vengthlang pawhin SYS FC 3-2 in an hneh a, MPL club lakah First Division club BVT-in point thum an hlawh chhuak a, Lunglei club-in point an hmu lo.

Boruak a hot

Sihphir Venghlun coach Robert Laldinthara'n a thu zuk loin sa huai a rawn ser a, attacking football khelin PC Lalruatsanga hmangin Ramhlun Athletic lakah goal an khung hmasa. Amaherawhchu first half-ah vek Letminton Singson hmangin Ramhlunin siphurh an sut.

Mahse, second half-ah pawh Sihphir Venghlun bawkin goal khung hmasain Malsawmtluanga Pautu goal hmangin hma an hruai. 2-1 in inkhel tawp se, Sihphir Venghlun hi semifinal lut tur a ni.

Chhandamtu Flavius

Tla thei dinhmunah Ramhlun an ding a, chhantu an mamawh. Mamawh hunah tak captain Flavius a rawn pen chhuak a, vei lam aṭanga Opitea cross luh chu minute 75-naah box chhung aṭangin a volley lut - a mawi takzet.

Minute li hnuah Flavius bawk a rawng lang a, wall pass hmanga Sihphir Venghlun tlarhnung ṭhiatin box pawn aṭangin kawh zetin a pet goal. Flavius-a goal ropui vangin Ramhlun an hlim.

Mahse, Ramhlun hi nuamsa takin an chak bik lo. Minute 90-naah SVFC-in substitute Lalremruata hmangin siphurh an sut a, beiseina thar an nei. Amaherawhchu Ramhlun tlarhnung an ṭang khawng a, 3-3 in inkhel a tawp.

Ramhlun hian point thum an hlawhchhuah theih loh avangin semifinal lut tho mah se group-a pakhatna nih theihna hun ṭha an bawhpelh. SVFC laka an goal neih an vawn him theih loha vangin final kalkawng a harsat phah theih ang.