US Open khel lo tur Nadal

Rafael Nadal chuan US Open a khel dawn lo tih a sawi chiang a, tennis a chawlhsan nghal dawn em tih erawh a la sawi chiang mai thei rih lo thung a ni.

Spanish star Nadal hi hliam na takin a nghawng a, ngai a awh leh thei tawh lo. Hun rei tak hnuah lo kir leh mah se hlawhtlin a harsa tawh - Paris Olympic pawh kha khel mah se, singles leh doubles huangah a champion lo.

Kum 38 mi Nadal chuan, "New York khawpui hi sulhnu ṭha leh ropui tak tak ka neih tawhna hmun a ni a, hun nuam tak ka hman tawhna a ni bawk - kuminah ka pan thei dawn lo, ka ngai dawn hle a ni," tiin a sawi.

Nadal hian Grand Slam nomawi 22 tehmeuh a chawi a, heng zinga pali chu US Open nomawi niin French Open tih lohah chuan New York khawpui hi a hlawhtlina tamna hmun a ni hial.

Tun season tir lam khan Australian Open aṭangin a inhnukdawk a, clay court inelna lian French Open khel mah se beisei a phak lo. Wimbledon khel loin tunah US Open a khel thei dawn leh ta lo a ni.

Kumin atan Grand Slam pali zinga pathum a khel dawn lo tihna a ni, hetih lai hian September thla hian Berlin khawpuiah Laver Cup khelh a ni dawn, he huna inlan tur hian ruahmanna chu a la siam thung a ni.