Season thar inbuatsaih danah Arteta a lawm

Arsenal manager Mikel Arteta chuan Premier League season thar atan an inbuatsaih dan a ṭha tawk tih a sawi a, kum hmasa lam nena khaikhin pawhin team nghat ṭha zawk an ni tawh niin a sawi bawk.

Gunners hian Nilaini zan khan Bayer Leverkusen an lo mikhual a, German champion hi 4-1 in an lo hneh. Oleksandr Zinchenko, Leandro Trossard, Gabriel Jesus leh Kai Havertz ten goal khat ṭheuh an khung.

Arteta chuan, "Team hmasawnna hmuh hmaih theih a ni lo, hei chauh ni loin mimal tin pawhin hma an sawn hle. Senior player karah naupang zawkte pawhin ṭha takin an khel vek, beiseina sang tak min siamsak.

"Player tin an inman em em tawh a, season thar inbuatsaihna chauh la ni mah se kan ti mai mai lo, theihtawp takmeuh kan chhuah ṭhin, hetiang hi inelna tak kan neih hunah pawh kan beisei dawn a ni," a ti.

Emirates Stadium-a inkhelah hian Granit Xhaka chuan lawm a hlawh hle. Swiss midfielder hian nipui bazar hmasa khan Arsenal chhuahsanin Leverkusen hi a zawm a, German champion hial a nih pui a ni.

North London club hian EPL season thar inbuatsaihna hnuhnung atan Pathianni zan hian Lyon nen Emirates Cup an khel dawn. August 17, Inrinni zan hian Wolves nen EPL bul an ṭan ang.