Mittui nen Vinesh Phogat a liam

Mihring tam berna India beiseina a ni a, mi tluklehdingawn khat leh a chanve zetin beseina sang tak nan Vinesh Phogat lam an hawi a, mahse Paris Olympic 2024 aṭangin hnawl a ni ta a ni.

Indian wrestler hian Women’s Freestyle 50kg final a lut, inelna tir lamah a rih zawng dik thlap mah se final hmain buk ṭhat leh a ni a, a rih tur zat bituk aiin 100 grams chuang hretin an lo rit - Olympic aṭanga paih chhuah a ni a, a hnuah infiamna khawvel a mangṭha thu a sawi nghal.

Phogat-i leh a team te chu, infiamna lama thubuai ngaihtuahtu sang ber Court of Arbitration for Sport (CAS) hnenah an zualko a, final match khelh phaksak emaw, silver medal chu midang nena dawn kawp an dil.

An dihna hi CAS chuan a ngaihtuah a, nizan khan thutlukna a siam ang - CAS thu leh hla hi an beisei sang vak lo a ni mai thei. Thu an hriat hmain Phogat chuan X (twitter) lamah wrestling a chawlhsan thu a puang.

Kum 29 mi Phogat chuan, "Ka chak lo, min ngaidam rawh u, induhthusam leh suangtuahna chu ka tihlawhtling thei lo a ni. Tun hma angin châkna leh phurna reng ka nei ta lo. Wrestling 2001-2024 mangṭha mai le," a ti.

Haryana mi Phogat hian tun hmain India tan medal tam tak a lo la tawh. Asian Games 2018 (1), Asian Championship 2021 (1) bakah Commonwelath Games (3)-ah te gold medal a la tawh bawk a, infiamna khawmpui lian ber Olympic medal a beiseina erawh a thamral ta rih a ni.