Medal 1000 la tling thei GB

Great Britain chuan Paris Olympic neih laiah medal 49 an la tling tawh a, tun hma lam nena chhutin infiamna khawmpui lian berah hian medal 1000 an la tling tawh a ni - an la belh chhah ngei ang.

Britain hian Paris Olympic bikah gold medal 12, silver medal 17 leh bronze medal 20 an la tawh, inelna neih kal mek a nih avangin chanchinbu chhiar lai pawhin a lo danglam leh hman tawhin a rinawm.

Nimin tlai thleng kha chuan United States chuan medal 94 la tawhin Paris Olympic neih laiah hma an hruai mek a, a chung bera a tawp khar turin an dinhmun a ṭha hle.

US elpui ber ni ṭhin China chuan medal 65 an la ve tawh bawk a. Ram lian leh changkang pahnih hi khawvel sumdawnna chauh ni loin, infiamna khawvelah pawh inel leh inum na ber an ni ṭhin.