Tottenham an inthuamṭha zel - Solanke an duh

Ange Postecoglou-a'n season tharah kut ruaka hun hman a tum tawh lo - striker lakluh a tum thu a lo sawi tawh chu a bawhzui chat a, Tottenham Hotspur chuan Bournemouth striker Dominic Solanke lakluh tumin an hel.

Bournemouth erawhin an striker hi chhuahtir an tum lo viau niin English media-te chuan an tarlang a, Cherries-ah hian kum 2027 thleng contract a neih avangin an player chhuanvawr hi chelh an duh.

Mahse, kum 26 mi striker hian England tana inlan phak turin club lian zawka khelh a mamawhah a inngai a, Cherries tan lungawi lo chunga English striker chelh hi a harsa mai thei.

Tu maw Solanke?

Kum 26 mi Solanke hi Chelsea academy aṭanga inzir chhuak niin, English striker beiseiawm tak a ni ṭhin. 2014-15 season khan Chelsea Academy Player of the Year atan thlan a ni a, England Men's Youth Player of the Year atan kum 2014 khan thlan a ni bawk.

FIFA Under-20 World Cup 2017-ah England champion puiin, best player atan thlan a ni a, hmabak nei êng tak striker-ah ngaih a ni ṭhin. Chelsea-a a awm lai hian Dutch club Vitesse-ah loan-in a khel a, match 26-ah goal sarih a khung.

Chelsea tan vawi khat chiah a inlan hman a, Blues hian chelh duh mah se, Liverpool sawmna pawmin Reds a pan. Mahse, beiseina sang taka Anfield pantu hian beisei a phak lo a, match 27-ah goal khat chiah a khung!

Solanke harhna

January 2019 khan Bournemouth an lo lang a, pound maktaduai 19-in Solanke an lei chhuak. English striker hian beisei angin a khel zui mai lo - kum khat leh a chanve chu Cherries tan Premier League khelin, inelna hrang hrangah match 46-a khelhah goal li chiah a khung!

Mahse, 2020-21 season-ah Championship-ah an tla a, Solanke a insiamrem ṭan. English second division lama season hnih hun a hman chhungin match 93-ah goal 45 a khung a, Premier League an kai hnuah pawh a chet ṭhat chhunzawm.

2022-23 season khan match 35-ah goal sarih a khung a, season hman zawh takah match 42 khelin goal 21 a khung - heti chung hian Gareth Southgate-a'n Euro-ah a hruai lo a, Three Lions tana inlan phak turin club lian tana inlan a ngaiah a ngai.

A man a to

Bournemouth-in an duh ber chu Solanke chelh a ni a, mahse, a contract-ah hian £65mtd-a chhuah theihna dan a awm - Spurs hian heti zata an ngam chuan Cherries tan an duhlai hi chelh ngaihna a awm lo ang.

Spurs boss Ange Postecoglou chuan, "Tlarhma hi kan panna lai ber a la ni rih a ni," a ti a, captain Harry Kane an chân hnuah a thlakna tur an la lei lo - he hmun ruak hi Solanke-a'n a hnawh khah theih an beisei.

Chutihrual chuan Spurs hian Lille forward Jonathan David pawh an thlithlai tho a, Cherries an ṭang lui tlat a nih chuan Canadian striker hi uluk zawka an rim a rinawm - kum 24 mi hian season hman zawh takah khan Lille tan match 47-ah goal 26 a khung.

Spurs dinhmun

Brazilian striker Richarlison chu Saudi Arabia lam club-ten an duh nia sawi a ni a, London club hian man man taka an hralh thei a nih chuan a chhuah an pawi ti lo ang - Richarlison hi a chhuak ta lo a nih pawhin striker lei erawh an tum hrim hrim.

Spurs hian forward neih sa Bryan Gil (Girona) leh Alejo Veliz (Espanyol) chu season khat chhung atan loan-in an chhuahtir tawh a, naupang rual Dane Scarlett, Will Lankshear, Jamie Donley leh Mikey Moore nei mah se, rinrawl chi an la ni rih lo.

London club hian midfielder pahnih Lucas Bergvall (£8.5mtd) leh Archie Gray (£30mtd) an la lut tawh a, South Korean winger winger Yang Min-hyuk (a man tarlan loh) chuan January 2025-ah a zawm dawn a, loan-in RB Leipzig striker Timo Werner an la tawh bawk.