Spurs-in rawlthar duhawm an chelh

Tottenham Hotspur chuan winger Mikey Moore chu an hnena cham zel turin an hmin a, kum 16 mi midfielder hian Spurs tana season thum dang khelh chhunzawm turin contract a ziak ang.

Moore tan a professional contract hmasa ber tur a ni dawn a, Pathiannia kum 17 a tlin hunah contract hi a ziak ang. FIFA danah player-in kum 18 an tlin hma chu kum thum aia tam contract a ziah theih loh a, football thuneitu sangin a phal chin thleng Spurs hian an ziahpui a ni.

English midfielder hi club dang pawhin an hel nual a, hei vang hian Spurs hian kum 17 hnuai lam contract an ziahpui tawha tam ber chu Moore hi an ziahpui dawn - a zat chiah erawh tarlan a awm lo thung.

May 14, 2024 khan Moore hian Premier League-a Manchester City an hmachhawn ṭumin, Spurs jersey nen khelmual a lut a, Tottenham tana Premier League-a inlan thei naupang ber record a siam. Hetihlai hian kum 16 leh ni 277 mi a ni.

Spurs tan a pumpuiah match hnih khel tawhin, pre-season tour-ah erawh coach Ange Postecoglou chuan a chhawr ṭangkai hle. Postecoglou chuan, "Mikey hi club tana kan khelhtir aṭang khan hma a la sawn zel a ni.

"Nikum kum tawp lam aṭang khan kan zingah a tal ṭan a, training-ah a theihnate kan hmuh reng avang leh, a tihṭhat ṭhin em avangin first team zingah a tel a ni. Hma a sawn zel theih nana puih hi kan tih tur a ni a, kan hriat reng tur chu nikum khan hliamin a tibuai a, kum 16 chauh a la ni bawk tih hi a ni," a ti.

Moore hian England Under-17 tan match 12 khelin goal 10 a khung a, European Under-17 Championship 2024, June thlaa khelh zawh takah khan ram tana feh chhuakin, goal li a khung a, quarterfinal-ah champion zui ta Italy chu penalty-a hneh loin an tla.