Liverpool-in Zubimendi an thlithlai

Premier League club lian zinga an reh vung vung hnuin Liverpool-in transfer bazar-ah thawm an rawn nei ve ṭan a, Real Sociedad midfielder Martin Zubimendi chu lakluh tumin an hel niin khawthlang media-te chuan an tarlang.

Arne Slot enkawlna hnuaia season thar hmachhawn tur Reds hian number 6 thar lakluh an duh nia sawi a ni a, Spain international hian an mit a la hle. Chutihrual chuan Reds hian buaina an nei a, kum 25 mi midfielder man hi a to hret.

Zubimendi hian chhuah theihna dan a nei a, mahse, a contract-a release clause hi euro maktaduai 60 a tling daih. Liverpool hian number 6 lei nan heti zat sen hi an huam ang em, tih chu zawhna a ni a, huam ta pawh ni se, Zubimendi hi a chhuak duh ang em, tih chu zawhna dang a ni leh.

Euro 2024 champion Spain team zinga mi Zubimendi hi Real Sociedad chhuak niin, amah siam liantu club tih loh, club dang tan a la khel ngai lo. Season hmasa pawh khan Arsenal leh Barcelona-in an lo rim tawh a, mahse, amah ber hian chhuah lam a hawi rih lo.

Spain team-a Rodri thachhang dawltu Zubimendi hian Real Sociedad tan match 188 khel tawhin, goal riat a khung a, assist vawi sarih a nei bawk.

Reds hian defensive midfield-a khel turin Wataru Endo an nei sa a, pre-season-ah Slot chuan Dominik Szoboszlai leh Ryan Gravenberch te chu defensive midfield-ah a chhawr bawk a, an khel chhe hran lo.

Liverpool hian tun season-ah midfielder Thiago Alcântara an thlah a, season hmasa khan Jordan Henderson leh Fabinho chu Saudi Arabia sum mawm lakah an lo chân tawh bawk a, midfielder lakluh tur zawnga an mit an len hi a awm lo hran lo.