Atletico-in Guerra an la lut dawn

Real Madrid leh Barcelona rorelna titawp a, Spanish football roreltu ni turin Atletico Madrid an insangphek hle - nipui transfer-ah thawm an nei leh tawh a, Valencia midfielder Javi Guerra an la lut dawn.

Atletico hian Valencia chu a thu phungin inremna an neihpui tawh a, an inrem dan chuan euro maktaduai 25 an pe phawt ang a, a khelh ṭhat dan a zirin an pek belh leh ang - Atletico hian an hralh leh a nih chuan Valencia hian 15% share an nei dawn bawk.

Guerra hian senior team-ah chuan Valencia tan bak a la khel ngai lo a, mahse, youth team-a a khelhna ṭhin Villarreal chuan amah hralhna aṭang hian 30% pawisa an dawng ve leh dawn a ni.

Kum 21 mi midfielder hian Valencia training pawh a zawm tawh lo a, Atletico a zawm ngei a rinawm - hetihlai hian Conor Gallagher chuan Chelsea aṭangin Atletico hi a zawm dawn bawk a, mimal thilah an la inrem lo.

Atletico hian inrempui thei ve ve ta se, midfielder pahnih an la ang em, tih chu zawhna awm mek a ni a, Atletico hian Guerra hi an la lut ta chiah lo a nih pawhin Girona leh Real Sociedad ten an rim ve mek bawk.

Guerra hian season hman zawh takah khan inelna hrang hrangah Valencia tan match 40 khelin goal li a khung a, assist vawi khat a nei bawk. 2022-23 season khan senior team tan inlan ṭan ve chauhin, match 10 a khelhsakah goal khat a khung a ni.