Morata leh Rodri an hrem

Spain captain Alvaro Morata leh Euro 2024 an champion theih nana player pawimawh Rodri te chu an champion an lawm ṭuma an chet dan mawi lo tak avangin UEFA chuan a hrem a, La Roja tan match khat an inlan thei dawn lo.

Spain hian July 15 khan Cibeles Square, Madrid khawpuiah an fan-te nen champion an lawm a, Britain awpna hnuaia awm, Spain ram chhim lama ram tê tak tê Gibraltar huat zawng takin Morata leh Rodri hi an che hman.

Manchester City midfielder Rodri hi, "Gibraltar chu Spain-a awm a ni," tiin a zai a, Morata chuan lo pui vatin, fan-te chu an au hla zawm turin an ti zui. Hei hi Gibraltar Football Association (GFA) lam chuan hrethiam loin, UEFA hnenah an zualko a, European football-a thuneitu sang hian an zirchian hnuah player pahnih hi a hrem ta a ni.

UEFA chuan player pahnih hi infiamna huang chhunga mawi lo taka an chet avangin an hrem a, thil nihdan phung awmsa an bawhchhia a ni, an ti a, football leh UEFA hmai an tibal a ni, an ti bawk. Mipui 30,000 chuang awrh awmna Gibraltar hi kum 2013 aṭang khan UEFA member an ni ve ṭan a, Gibraltar FA chuan Spain player pahnih chet dan hi an dem takzet thu an lo sawi tawh.

Spain hian September 5, zan dar 12:15-ah Serbia chu UEFA Nations League khel turin an zin chilh dawn a, Morata leh Rodri an tel thei dawn lo - chawlh thlahlel ve ṭhin tak footballer-te tan hremna na tak a ni kher lo ang!