Chelsea-in Atletico striker la dawn

Nipui transfer-ah Chelsea an reh meuh lo - Atletico Madrid forward Samu Omorodion lakluh tumin an hel a, he thuziak i chhiar meuh chuan Spanish forward hi an la lut fel tawh hial mai thei.

Atletico hi nipui transfer-ah an che na hle. Manchester City forward Julian Alvarez chu la lut turin Premier League champion hi inremna an neihpui tawh a, Argentine striker manah hian pound maktaduai 81.5 an seng dawn.

Alvarez pawh hian Atletico zawm hi a remti tawh a, Spanish club hian £64.4mtd chu City hi an pe phawt ang a, a bak £17.1mtd chu a khelh ṭhat dan a zira pek belh tura tih a ni.

Atletico hian Alvarez man tuakna tur hi an mamawh ve tho a, hei vang hian Omorodion chhuahtir hi an pawi ti lo ang - hetihruala hriat tel tur chu Spanish club hian Chelsea aṭangin midfielder Conor Gallagher chu £33mtd-a la lut turin inremna an neihpui tawh bawk.

Kum 20 mi Omorodion hian season hmasa ṭan dawn khan Atletico hi a pan ve chauh a, Madrid khaw club hian Alaves lamah loan-in an kaltir nghal - La Liga club tan hian match 35 khelin goal riat a khung.

Omorodion hi Olympics football khelin Spain tan a feh chhuak mek a, La Roja hian final an lut tawh - zanin dar 9:30-ah inelna thlengtu France nen gold medal inchuhin an inkhel ang.

Sum hmang ṭhang Chelsea hian tun nipuiah player lei nan pound maktaduai 100 chuang an seng leh der tawh a, midfielder pathum Kiernan Dewsbury-Hall, Renato Veiga & Omari Kellyman, goalkeeper Filip Jorgensen, defender pahnih Tosin Adarabioyo & Caleb Wiley, winger Estevao Willian leh striker Marc Guiu te an la lut tawh.

Hetihrual hian Blues hian player an hralh ṭhen ve tho bawk a, defender pahnih Ian Maatsen & Lewis Hall leh forward Omari Hutchinson te chhuah tirin, Hakim Ziyech, Malang Sarr leh Thiago Silva te chu free transfer-in an chhuak.

Gallagher chu a chhuak dawn chiang tawh a, season hnih chhung loan-a thang bo tawh Romelu Lukaku pawh a chhuah ngei a rinawm.