Poland chakpuitu Lewandowski

Nilaini zan khan Poland-in Bosnia-Herze-govina 3-0 in an hneh a, Bayern Munich striker Robert Lewandowski a langsar leh hle. Lewy hian goal hnih a khung bakah midfielder Karol Linetty goal khung tur a siamsak bawk.

Bosnia player Anel Ahmedhodzic chu minute 14-na lekah Lewan-dowski goal khung tur a tih tluk avangin red card a pek a ni a, hemi hnu hi chuan Poland tan hna a awlsam hle. Kum 32 mi Lewandowski hian ram tan goal 63 a khung tawh a, season liam ta khan Bayern tan match 47-ah goal 55 khungin Champions League, Bundesliga leh DFB Pokal-ah a champion pui.

Lewy hi tun hnaia striker nei ṭha ber ang hiala chhal theih a ni a, Bayern tan match hnuhnung 99-ah goal 100 a khung bakah Poland tana match hnuhnung 10-ah goal riat a khung bawk. Poland hi Italy leh Netherlands awmna group a an awm chungin an group-ah hmahruaitu an ni mek a, Lewandowski an kawl bawk avangin finals lut thei an ni.

Poland striker Robert Lewandowski chuan, "Kan khelh dan kha Poland ṭhat theih dan ber a ni em tih min zawt a nih chuan,  'A ni lo', tiin ka chhang ang. Tun aia ṭhain kan la khel thei a, a bik takin kan khingpuite kan nawr danah insiamṭhat kan la ngai. Chutihrualin point thum kan hlawh chhuak a, a lawmawm hle," tiin a sawi.