Ram ropui hmaah team huaisen france Vs Iceland
Euro 2016 khelh a nih hma khan tuin nge quarterfinal-a Iceland an din ring tehlul ang? Mahse, he team huaisen hian tih theih loh nia ngaih chu an ti a, beisei ngam loh nia ngaih chu huaisen takin an bei a, inelna thlengtu France hmaah semifinal luh tumin an ding dawn ta.
Team pahnih squad en chuan France hi chak chiang sa an ni. Mahse, result hi lehkhaa chinfel tur ni loin khualmualah lantir tur a nih miau avangin football ram ropui nia inchhal England player-te an puanthuah teltirtu Iceland dahhniam theih an ni lo - Pathianni zan dar 12:30-ah engkim chinfel a ni dawn.
Iceland an phur
Euro an khel phak ringawt pawh lawmna tham a nih tawh tehlul nen Iceland-in Portugal, Austria leh Hungary awmna group aṭanga tlawm hmel hmu lo chungin last 16 an lut a, quarterfinal lut turin England an hneh zui!
Mipui 330,000 lek chenna ram an phur a, an ram chanchinbu lar Morgunblaðið chuan "Thawnthu ngaihnawm chu ziahin a awm zel a" tiin an ziak a, Fréttablaðið chuan, "Engtikah tak tawp ang maw?" tiin an mumang chu tawp mai atan an phal lo!
Kum 2010 khan tlang kang nasa tak 'Eyjafjallajökull' chuan Iceland ram a
ṭhawng a, nunphung a tih khaihlak a, a ram buaiin an buai a, tlang kang lo chu sawi tur an hre lo - Morgunblaðið chanchinbu chuan kha Volcano rapthlak tak a thlen hnua Iceland mipuiin an ngaihven ber chu France an hmachhawn tur hi niin an tarlang!
Team inthlau chu
France ram chanchinbu lar L'Equipe chuan team pahnih hlutna an khaikhin a, Pathianni zana starting eleven chang tura beisei player-te inthlauhna hi sang tak a ni! L'Equipe chuan Iceland laka inkhel
ṭan tura beisei France player 11 hlut zawng chu pound maktaduai 287.46 a nih laiin Iceland starting eleven tura beisei player-te hlut zawng belhkhawm erawh pound maktaduai 18.75 a ni thung - hemi awmzia chu tunlai football bazar-a striker vantlang man leh Iceland starting XI man zat hi a intluk tawk vel tihna a ni.
Mahse, Iceland-in player hlut zawng tehnain awmzia a neih lohzia England lakah an lantir tawh a, France player to rual hi an ramah chawlh an pe lo ang tih a sawi theih loh - hemi hrechiangtu L'Equipe chuan, "Vikings (Scandinavian mipui sawina) lakah fimkhur ru" tiin an chanchinbu phek hmaah an ziak a, France mipui beiseina titawp turin Iceland an ṭha tawk tih an hai lo.
Tute nge inlan ang?
France defender Adil Rami leh midfielder N’Golo Kante te chu yellow card vawi hnih an chawi avangin quarterfinal-ah hian an inlan thei dawn lo. Sevilla centre-back Rami aiah hian Barcelona player thar Samuel Umtiti chu inkhel bul ṭan tura beisei a ni a, midfield laiah Moussa Sissoko emaw Yohan Cabaye ten Kante hmun ruak an luah thung ang.
Iceland manager pahnih Lars Lagerback leh Heimir Hallgrimsson ten quarterfinal lut tura an zinkawngah starting eleven an la thlak danglam lo a, an player zingah inhliam leh hrem tawk an awm loh bawk avangin England hmachhawn team aṭangin an inthlak danglam a rinawm loh.
Lars fak rawh u!
Iceland manager pakhat zawk Heimir Hallgrimsson-a'n an ram team-a enkawl bakah dentist (ha daktawr) hna a thawk tel a, manager pahnih zinga tawnhriat ngah zawk chu Sweden coach pawh lo ni tawh Lars Lagerback a ni.
Heimir Hallgrímsson chuan, "Iceland hi football-ah chuan mi thar chauh kan la ni a, hetichunga tawnhriat ngah manager Lagerback-a'n kan team enkawl a thlang hi a lawmawm takzet a, a hlutzia hi pawisaa chhut chi pawh a ni lo. Iceland tan a hriatna zawng zawng a hlan a, fak a duh lo tih hre mah ila fak loh theih loh a ni," tiin a manager pui chu tun dinhmun an thlen chhan a nih thu a sawi.
Iceland manager Heimir Hallgrímsson chuan hnehna chan tuma France an hmachhawn tur thu sawi chhunzawmin, "Rinkai loh leh chak lo tura rin zawk ni mah ila thil tam tak kan ti thei tih kan lantir tawh a, ṭawiawmtu fans kan nei ṭha em em bawk. Hlauh nei miah loin khelmualah player-te an tlan lut ang a, chutiang bawk chuan khelmual pawn aṭangin keinin kan lo ṭawiawm ang," tiin France hlauh a tum lo.
Min hrilh rawh Thawnthu hlui!
Iceland hmachhawn tur France tan team pahnih lo inhmachhawn tawhna thawnthu hlui hriat a nuam a, 'min hrilh rawh thawnthu hlui' tia intihphur an tum a nih pawn a awm lo hran lo ang - team pahnih vawi 11 an inhmachhawn tawhah France-in vawi riat hnehna an chang thei a, vawi thum an inhnehtawk thung.
France defender Patrice Evra chuan, "Iceland hian long throw an hmang
ṭangkai ṭhin tih hi phat rual a ni lo a, dan chah pawh kan tum ang. Mahse, he team hian ṭhatna dang tam tak an nei tel tih kan hre tur a ni a, pakhat chauha kan rilru kan pek lutuk chuan kan chesual palh ang tih a hlauhawm a ni," tiin fimkhur taka inkhelh a pawimawh thu a sawi.
Kingsley Coman pawhin Iceland laka fimkhur a ṭul tih a hai lo a, Bayern Munich forward chuan, "Eng game awlsam mah a awm lo. England laka thil thleng kha kan hmu vek a ni," tiin Iceland chu eng team pawh hneh thei khawpa ṭhaah a ngai.