Napoli an chak loh tir

Juventus nena Serie A match an khelh dawn ṭuma inlan lo Napoli chunga hremna a chhuak a, 3-0 a chak lohtir an nih bakah an point hmuh tawh sa aṭangin point khat paihsak an ni bawk.

October thlatir khan Juve khelmual Allianz Stadium-ah Napoli hi lenglut tur an ni, mahse player zingah coronavirus kai pahnih hmuhchhuah an nih avangin Napoli hi am awmna khawpui Naples thuneituten zin chhuak lo turin thu an pe.

Thu pek an hmuh angin a zin lo ngei a, mahse Turin khawpuia awm an khingpui tur Old Lady lam erawh inkhel turin stadium-ah an kal thung - an khingpui tur an awm mai loh avangin an inkhel thei ta bik lo, chawlh kar khat aia rei ngaihtuah a nih hnuah tlutlukna hi an puang.

Serie A dam leh hrai ang chuan inkhel tura inlan lo hi 3-0 a chak loa puan tur an ni a, an dan ang thlapin Napoli pawh an hrem. Hrem an nihnaah Napoli lam an lungawi lo, "Dan leh hrai hi kan zah reng, rorelna dik a awm theih nan kan khing let ang," tiin twitter lamah an tarlang a ni.

Italian champion hian inkhelh hah ngai loin point thum an hlawh chhuak a, nuamsa taka point an neih chhan hi Covid-19 vang a ni. Tunah erawh hri leng vang hian an thiampuipa Cristiano Ronaldo an chhawr thei dawn lo.

Nations League khela a feh chhuahna lamah Ronaldo hian hri leng a kai a, Italy ram inkaihhruaina dang angin ni 10 chhung khung hran a ngai dawn. Portuguese forward hian Crotone leh Dynamo Kiev te a hmachhawn thei dawn lo tih a chiang.

Ronaldo bakah hian Schalke aṭanga loan hmanga an hawh American midfielder Weston McKennie chuan coronavirus a kai bawk, team pumpui chu khunghran an ni. October thlatir pawh khan club hnathawk zinga miin hri an kai vangin squad pumpui hi khung hran an lo ni tawh bawk.