Manchester United striker thar Ibrahimovic
Swedish striker Zlatan Ibrahi-movic chuan season tharah chuan Manchester United tan a khelh tur thu social media lamah a puang a, "Khawvel hriata puan a hun ta - ka kal lehna tur chu Manchester United a ni," a ti.
Kum 34-a upa striker hian Old Trafford-a pan dawn takah chuan Inter Milan lama a boss hlui Jose Mourinho nen an thawkdun leh dawn tihna a ni a, manager leh player ṭawng duh tak thawk dun tur hian khawvel ngaihven a hlawh hle.
Man United chuan Ibrahimovic chungchangah hian thuchhuah an la siam lo thung a, club hrang hrang tan match 677 a inlana goal 392 khungtu striker hian medical a la paltlang loh bakah contract ziah a la ni lo - Old Trafford-ah hian kum khat cham tura contract a ziah rin a ni.
Nomawi leh Ibra
Sweden tan vawi 116 inlana goal 62 khungtu striker hian kum 1999 khan an khaw club Malmo-ah bul a ṭan a, Ajax, Juventus, Inter Milan, Barcelona, AC Milan leh PSG-ah a khelh chhunzawm.
Season hman zawh takah khan PSG tan match 51 a inlanah goal 50 a khung a, French club tan season khata goal khung hnem thei ber niin league match-a goal 38 a khung chu club record a ni bawk.
Euro aṭanga Sweden an tlak hnua ram tana inkhelh chawlhsan striker hian kum 2001 hnuah season tinin nomawi chawi loh a nei ngai lo a, heng zinga 13 chu league title niin ram paliah nomawi 30 a chawi - PSG a season li a cham chhungin nomawi 12 a chawi hman.
Manager leh Ibra
I Am Zlatan Ibrahimovic tih lehkhabuah Swedish striker hian, "Mourinho tan chuan thih pawh ka huam ang," tiin a manager hlui hi a lo fak tawh a, Manchester City boss thar Pep Guardiola erawh manager lak tlak loh tak a nih thu Barcelona-a an lo thawhdun tawh avangin a sawi thung - Manchester Derby a ngaihnawm lehzual dawn.
United tan hlawkna
Manchester United tan Ibra lakluh hi khelmual chhunga thla-muanpuitham a nih tluk zetin khel-mual pawn lamah an hlawkpui dawn. Football finance expert Rob Wilson chuan Ibra chu Cristiano Ronaldo hnua United player thawm lian ber a nih a beisei thu a sawi a, Ibra hming chuanna jersey hralhna aṭang ringawtin United hian pound maktaduai 50 vel an lakluh beisei a ni.
Ibra Nomawi
Ajax : Eredivise (2001-02, 2003-04), Dutch Cup (2002) Dutch Super Cup (2003)
Juventus : Serie A (2004-05, 2005-06) *Juve hi match fixing vangin an nomawi hi hlihsak leh an ni
Inter : Serie A (2006-07, 2007-08, 2008-09) Italian Super Cup (2006, 2008)
Barcelona : La Liga (2009-10), Spanish Super Cup (2009, 2010), Uefa Super Cup (2009), Fifa Club World Cup (2009)
AC Milan : Serie A (2010-11) Italian Super Cup (2011)
PSG : Ligue 1 (2012-13, 2013-14, 2014-15, 2015-16), French Cup (2015, 2016), League Cup (2014, 2015, 2016) French Super Cup (2013, 2014, 2015)