Euro 2016 Semifinal lut hmasa ber Portugal
Portugal-in Euro 2016 group stage match thumah point thum hlawhchhuah an nei lo a, knockout stage-ah minute 90 chhungin hnehna an chang lo. Chutichung chuan Portugal hi semifinal thleng hmasa ber an ni a, last 16-a champion rinkai Croatia hnehtu hian quarterfinal-ah Poland hneh lehin champion turin match hnih chiah chak a ngai ta.
Stade Velodrome, Marseille-ah Poland captain Robert Lewan-dowksi-a'n goal a khung ve ta a, Bayern Munich striker hian ṭan
aṭanga second 100-na lekah a khung. Portugal-in minute 33-naah an siphurh an sut a, goal khungtu hi season thar aṭanga Bayern Munich tana khel tur Renato Sanches a ni. Ningani zan inkhelah hian Cristiano Ronaldo-a'n chakna goal khung theihna hun ṭha ṭum hnih a hlah avangin goal dang a luh belh lo a, penalty shootout-ah Fernando Santos hote 5-3 in an chak.
Lewan-GOAL-ski
Poland captain Lewandowski-a'n qualifying-ah goal 13 khungin season liam ta khan Bayern tan match 51-ah goal 42 khung mah se inelna takah match li chhungin goal a khung lo.
Portugal an hmachhawn ṭumin Polish right back Lukasz Piszczek ball vawrh chu Southampton right back Cedric Soares-a'n a chhut sual avangin Kamil Grosicki-a'n hun tam zawk a neih phah. Ligue 1 club Stade Rennais FC winger Grosicki hian cross ṭha nei zuiin stiker ṭha Lewandowski-a'n chiang zetin a pet lut.
Bayern Munich striker hian second 100 lekah a khung a, Euro inelnaa Lewandowski aia khung rang chu Euro 2004-a Greece lama goal khungtu Dmitri Kirichenko chiah awmin Russian stiker hian second 65-na lekah a khung.
Lewandowski-a'n inrintawkna nei chhoin Pepe kaihhruai Portugal defence tan harsatna siam mah se Poland hian minute 25 a ral chuan goal khung belh aiin venhim an thlang a, Bayern striker pawh a langsar zui lo. Poland hian group stage-ah goal an chhuah lo a, last 16-a Xherdan Shaqiri goal ropui chu an lama lut awmchhun a nih avangin Poland coach Adam Nawalka thutlukna hi semifinal kalkawng awlsam niin a lang.
Hei le Renato
Portugal-in tlarhmaah Ronal-do leh Nani an nei a, Polish player-te tan Manchester United player hlui pahnih hi ven uluk a ṭul. Amaherawhchu Portugal hi player pahnih khat leka innghat an ni lo, Bayern Munich-in pound maktaduai 27.5 senga Benfica a-
ṭanga an lei Renato Sanches-a'n ram tana starting eleven a chan hmasak berah goal a khung.
Sanches hian nikum November thla khan Benfica first team tan a khel ṭan chauh a, Poland lama goal a khung hian kum 18 leh ni 316 leka upa niin European Championship knockout stage china goal khung thei naupang ber a ni. Euro inelna hrim hrimah erawh Portuguese midfielder hian Swizertland forward Johan Vonlanthen (Kum 18 leh ni 141) leh England striker Wayne Rooney (Kum 18 leh ni 237) te record a tluk pha lo a, Portugal tan bika Ronaldo (Kum 19 leh ni 129) record siam erawh a khum thung.
Ronaldo a vanduai
Portugal substitute João Moutinho chuan minute 85-naah ball fing a vawrh lut a, Ronaldo thiamna nena thlir chuan goal ngei tura ngaih a ni. Real Madrid forward hian a pet
ṭhelh avangin Polish keeper Lukasz Fabianski a ti buai pha lo.
Extra time ṭan aṭanga minute thumna lekah Portuguese left back Raphael Guerreiro inhliam vanga khelhna hmun chang Eliseu cross ṭha zet chu khawih fuh ringawt a goal thei ni tawh mah se Ronaldo hian a dang sual a, hun pawimawhah goal pawimawh a khung thei lo.
Hei erawh sawi hmaih loh a
ṭha, Ronaldo hian group stage-ah Austria lamah penalty a pet goal lo. Chutichung chuan captain mawhphurhna la ngamin Poland lama penalty hmasa ber a khung.
Quaresma a vul
Portugal-in knockout stage an thlen theih nana Hungary an draw theih nan Ricardo Quaresma cross chu Ronaldo-a'n a tauh lut a, veteran winger Quaresma hian semifinal an thlen theih nan Croatia lamah chakna goal a khung bawk.
Kum 32-a upa hian ram tan a la hlutzia tilang nawn lehin bench aṭanga lutin penalty shootout-ah chakna goal a khung. Penalty-ah hian Portugal keeper Rui Patricio-a'n Poland tana a vawi lina pettu Jakub Blaszczykowski ball pet chu ṭha takin a dang a, Euro 2016-a goal hnih khungtu Kuba a vanduai hle.
Penalty hmanga Switzerland hnehtu Poland leh 'draw specialist' Portugal ten penalty pet an thiam ve ve a, Kuba penalty hlah tih loh hi chu chiang taka lut vek a ni.
Eng nge an sawi?
Poland coach Adam Nawalka chuan, "Match khat mah chak loh kan nei lo, Euro 2016 aṭanga kan tlak chhan chu penalty a ni. Kan player-te'n an theihna zawng zawng an chhuah avangin ka chhuang a, kan khelh dan hi kan thlir kir dawn a, tunah rih chuan kan rilru a na a ni," tiin a vanduai thu a sawi.
Portugal coach Fernando San-tos chuan, "Kan kal zel avangin kan tum ram kan hnaih zel e. Penalty hi chu ṭhumvawr ang mai a ni a, huaisen a pawimawh. Poland in penalty an pet thiam tih hre mah ila ka naute khahlauthawng lo turin ka hrilh a, an chungah rinna ka nghat bawk," tiin a sawi.
Man of the match Renato Sanches chungchang sawiin Santos chuan, "Tuna Renato in hmuh hi nakina inhmuh tur niin ka hre lo. Renato hian theihna tam tak a nei a, hma a la sawn zel dawn avangin tun aia ṭha zawk hi in hmuh ngei ka ring," tiin a player a fak.
INKHEL THLIRNA TAWI
Portugal 1 - 1 Poland
POR : Renato Sanches 33'
POL : Robert Lewandowksi 2'
Penalty shootout-ah Portugal 5-3 in an chak
Tute nge inlan?
Poland (4-4-1-1): Fabianski; Piszczek, Glik, Pazdan, Jedrzejczyk; Blaszczykowski, Krychowiak, Maczynski (Jodlowiec 97'), Grosicki (Kapustka 81'); Milik, Lewandowski.
Portugal (4-1-3-2): Rui Patricio; Cedric, Pepe, Fonte, Eliseu; W Carvalho (Danilo 96'); Joao Mario (Quaresma 79'), Sanches, Silva (Moutinho 72'); Nani, Ronaldo.
PENALTY PET DAN
Portugal Poland
Ronaldo G Lewandowski G
Sanches G Milik G
Moutinho G Glik G
Nani G Blaszczykowski X
Quaresma G
Note :
* Portugal-in penalty an pet hmasa zawk
* G = Goal; X = Goal lo