Wimbledon Murray-a'n third round a lut

World number 2 Andy Murray chuan an ram mipuite beisei angin a khel chho zel a, Ningani zan khan Yen-Hsun Lu chu straight set a hnehin Wimbledon third round a inhlangkai.

Mipa single-ah player langsar leh chak tura rinkai chak lo an awm zauh zauh ṭan a - hmeichhe lamah pawh beisei loh result kan hmu a, French Open champion Garbine Muguruza chu second round paltlang zo loin a tla.

Murraya buai lo

Centre Court-ah seeded pahnih-na Murray chuan tun hnaia grass court-a khel ṭha tluang tak world number 76 Yen-Hsun Lu chu darkar khat leh minute 40 chhung lekin 6-3, 6-2, 6-1 in a hneh.

Taiwan tlangval Hsun Lu hian tun hnaiah grass court-ah bik match 11 zet hnehna a chang zawn tawh a, set khatnaah Murray service pawh a chhuksak ve hial! Mahse, Grand Slam vawi hnih champion tawh Murray hian game hnuhnung 20 aṭanga 17 zet lain harsa lo takin hnehna a chang.

Kum 29-a upa Murray chuan, "Awlsam taka hnehna chan vangin hahchawlh theih tihna a ni lo a, inkhel hautak zawk hmachhawn tura inbuatsaih leh nghal zel a ngai," a ti. Third round-ah John Millman nen an inhmachhawn zui leh ang.

Thiem leh Ferrer an tla!

Seeded pariatna chang phak Dominic Thiem chu Court One-a inkhel inhnehtawk takah Czech Republic tlangval Jiri Vesely lakah 7-6, 7-6, 7-6 in a chak lo. Kumin Wimbledon khelh meka tla tawh zingah chuan Thiem hi seeded chang sang ber a ni hial.

World number 64 Vesely hian kumin April thla khan world number 1 Novak Djokovic chu Monte Carlo Masters-ah a lo hneh tawh a, kumina Djokovic hneh thei player pahnih zinga a pakhat zawk a ni nghe nghe. Fourth round lut tur chuan seeded 31-na Joao Sousa a paltlang leh a ngai dawn a ni.

Player ṭha berte zinga mi ni pha lo mah se Spaniard David Ferrer hi Wimbledon quarterfinal vawi hnih khel tawh a nih avangin a sang pariat zing vela tel tur khawpa
ṭha chu a ni. Mahse, seeded 13-na hi seeded pawh ni phak lo French tlangval Nicolas Mahut lakah 6-1, 6-4, 6-3 in a chak lo.

Inkhel dangah seeded pa-rukna Milos Raonic-a'n a service ṭhat zia a pho lang leh a, Canadian tennis star hian Italian Andreas Seppi lakah vawi 25 ngawt ace siam chungin 7-6, 6-4, 6-2 in hnehna a chang.

Seeded pakuana Marin Cilic pawhin Raonic hnungzuiin third round a lut a, 2014 US Open champion hian Sergiy Stakhovsky lakah 6-2, 6-7, 6-4, 6-4 in hnehna a chang ve bawk.

Hmeichhia ve thung

Serena Williams hi hneh theih loh ang maia khel ṭha ṭhin a ni. Tun hnaiah erawh American star hi a chak lo fo - hneh theih a nih zia a lang. Serena hian second round a lut tawh thung.

Garbine Muguruza hi cham-pion tura rinkai ni mah se number 124 Jana Cepelova hneh loin second round-ah a tla a! Hmeichhe single champion tur rinthiam a har ta hle.

Seeded pahnihna Muguruza hi French Open champion a ni a, nikum khan Wimbledon-ah hian final lutin Serena lakah a chak lo. Kuminah inrintawkna sang tak nen inlan mah se Cepelova lakah 6-3, 6-2 in a chak lo nghal der.

Kum 22-a upa Muguruza chuan, "Nimin aṭang khan ka awm a nuam thei lo a, vawiin pawh ka harhvang lo hle. Ka taksa a chauin inkhelh a harsa ka ti a, inkhelh lai aṭang tawh khan ka nuamsam loin ka chau takzet," tiin a chak loh chhan chu a damsam loh vang nia a hriat thu a sawi.

2012 finalist Agnieszka Rad-wanska pawhin fiahna hautak a hmachawn nghal a, kum 18 chauha upa Ana Konjuh lakah 6-2, 4-6, 9-7 in hnehna a chang hram.

Radwanska hi Muguruza hnungzuiin a tla ve teuh hle - set khatna nuamsa takin la mah se set hnihn a a hloh a, set hnuhnung berah 7-7 niin Konjuh-i'n match point vawi thum ngawt a hmuh tawh chu a pawtthla leh hram zawk a ni.

Inkhel dang

Wimbledon champion vawi nga ni tawh Venus Williams pawh a kum tam belh tawh mah se a la hlauhawm reng a, Court 18-a second round inkhelah darkar hnih leh minute 24 chhungin Maria Sakkari chu 7-5, 4-6, 6-3 in a a hneh. Kum 36-a upa Venus hi tun ṭumah hian seeded pariatna a la ni phak a, last 16-ah seeded 29-na Darya Kasatkina nen an inhmachhawn leh ang.

Seeded pangana Simona Halep pawhin third round lut turin Francesca Schiavone chu awlsam tak 6-1 6-1 in a hneh ve bawk. 2014 semifinalist Halep hian hnehna chang tur hian darkar khar vel bak a mamawh lo a, Mona Barthel hnehtu Kiki Bertens nen an inhmachhawn leh ang.