Zaninah quarterfinal match zinga ngaihven hlawh ber GERMANY Vs ITALY

FIFA World Cup-ah Germany leh Italy hi vawi li ve ve an champion tawh a, European Championship-ah Die Mannschaft hi vawi thum an champion tawh laiin Azzurri hian vawi khat chiah nomawi an la chawi. Euro-a record nei ṭha zawk Germany hian an vanglai an hman mek avangin football ram tlachhe mek nia an sawi Italy hi hneh ngawt turah ngai suh, Antonio Conte hote hi champion lai Spain hnehtu an ni a, Die Mannschaft hian inelna lianah Azzurri hi an la hneh ngai lo.

Stade de Bordeauxah zanin dar 12:30 hian Germany leh Italy an inhmachhawn dawn a, inkhel tur hi quarterfinal match zinga ngaihven hlawh bera chhal ngam a ni a, tun inelnaa an result leh an sulhnu thlirin final khel atan an duhawm zawk hle.

Italy an tlo

Euro 2016 ṭan hmain Italy hian en kan an hlawh a, match hmasa bera Belgium an hneh hnuah erawh thlir dan a dang. Azzurri hian vannei takin Sweden an hneh chho a, group hmahruaitu an nih chian hnuah Republic of Ireland an hneh lo.

Spain-in Croatia an hneh loh ve bawk avangin group hmahruaitu an ni pha lo a, Italy an vanduai phaha ngaitu an tam. Coach ro rum Conte-a'n ngaihdan dang a nei a, khawvel barakhaihin Azzurri-in kawng tin renga Spain laka chungnung chungin semifinal an lut. Roma midfielder Daniele De Rossi-a'n Spain thiampuipa Andres Iniesta kap kara ball a thawlh lut chuan inkhel chungchang a sawi fiah a, Graziano Pelle-a'n chak nemnghehna goal a khung zawh chiaha bench lama player zawng zawng nen goal khung an lawm te chuan an lungrual zia a nemnghet bawk.

Tun hma aṭangin Italy hi goal venghim thiam a sawi ṭhin an ni a, tun ṭumah pawh hian tlarhnunga Juventus player pali Gianluigi Buffon, Andrea Barzagli, Bonucci leh Giorgio Chiellini te chu an chhuanvawr a ni.

Italy boss Conte-a'n inhliam vangin France-ah Claudio Mar-chisio leh Marco Verratti te a hruai thei lo a, tun ṭumah hian midfielder pawimawh De Rossi chuan inhliam vangin Germany a hmachhawn theih a rinawm lo a, midfield lai harsatna belhchhah turin Thiago Motta chu hrem vangin a inlan thei lo bawk ang.

German ral lian

Italy-in tlarhnung an chhuang a, an khingpui Germany hi Euro 2016-a goal chhuah lo awmchhun an ni. Joachim Low hote hi an ṭhat lohna lai sawi tur a tam tawh lo a, amaherawhchu an goal khung dan erawh duhthusam a la ni lo.

Northern Ireland nen an inkhelh ṭumin inkhel thunun chungin goal khat chiah an khung a, Slovakia lakah goal thum khung mah se an chance neih zat thlir chuan goal hmaah an la hriam tawk loah a ngaih theih. Zanin hian defence nei ṭha Italy lakah fiahin an awm dawn a, an paltlang zawh loh chuan Spain hnung an zui ang.

Italy an huai zawk

Italy leh Germany hi Euro 2012 semifinal-ah an intawng a, Mario Balotelli goal hnih hmangin Azzurri an chak. 2006 FIFA World Cup-ah Germany chu a thlengtu niin bul an ṭan ṭhat avangin champion tura rinkai an ni a, semifinal-ah Italy bawk an hneh lo. Hemi ṭum hian hun pangngaia goal a luh loh hnuin extra time-a Fabio Grosso leh Alessandro Del Piero goal hmangin Azzurri bawkin hnehna an chang.

Germany hi semifinal pahnihah hian rinkai zawk an ni ve ve a, inkhela chak zawk erawh Italy an ni. Azzurri hian 1982 World Cup final leh 1970 World Cup semifinal-ah Die Mannschaft hi an hneh tawh bawk a, record thlir chuan Italy hi chak tur zawk chu an ni. Amaherawhchu team pahnih intawnna hnuhnung ber erawh friendly match niin March 29, 2016 khan Munich-ah Toni Kroos, Mario Gotze, Jonas Hector leh Mesut Ozil te goal hmangin Germany chu 4-1 in an chak a. Die Mannschaft hi European Championship quarterfinal-ah an chak lo ngai lo bawk.

Friendly match nen vek ram pahnih hi vawi 33 an inhmachhawn tawh a, Italy hi vawi 15 chakin Germany hi vawi 8 an chak ve tawh a, vawi 10 dangah erawh an inhnehtawk.

Eng nge an sawi?

Italy coach Antonio Conte chuan, "Ka naute hian player naran chunglam theihna an nei a, an chhuanawm takzet. Xavi-a'n kan khelh dan hi Barcelona leh Atletico Madrid inchawhpawlh tiin a sawi a, football khel ṭhin chuan kan khelh dan an hrethiam niin a lang. Motta hi kan player 12-na a ni a, a awm lo tur hi a pawi takzet. Spain ai pawhin Germany hi an la harsa zawk thei a, chumi tur chuan kan inpuahchah a ni," tiin an khelh dana a lungawi thu a sawi.

Germany defender Mats Hummels chuan a tisual hmasa zawk chu chak loh thei an nih thu a sawi a, midfielder Toni Kroos chu an khelhpui tawh zinga ṭha ber an nih thu a sawi ve bawk.

Real Madrid midfielder Kroos chuan, "Spain kha rinkai zawk a ni a, Italy-in chiang tak maia an hneh khan min barakhaih a ni. Euro 2012 semifinal-a kan hneh loh ṭum khan game plan ṭha tak kan nei a, player mimal tihsual vangin kan chak lo a, tun ṭumah erawh kan chak theih ngei ka beisei," tiin a êng zawngin a thlir.