Kum 29 hnuah Giggs-a'n United a chhuahsan

Ryan Giggs chuan Old Trafford-a kum 29 a cham hnuah Manchester Untied nena an inzawmna chu club nen an inbiakrem hnuin a titawp.

Kum 42-a upa Giggs hian United-ah kum khat contract la nei mah se David Moyes leh Louis van Gaal-a hnuaia a mawphurhna neih ang kha manager thar Jose Mourinho hnuaia a neih theih dawn loh avangin Old Trafford chhuahsan hi a thlang ta a ni. Portuguese manager hian FC Porto a enkawl aṭang tawha a hnung zuitu Rui Faria chu amah puitu atan a hmang ang.

Wales khawpui Cardiff-a piang Giggs hian club lian enkawl tura coaching certificate neih tur ang te a nei vek tawh a, head coach nih a châk tih amah pawhin a zep tawh lo. United-in Moyes an ban khan Welsh manager hi rawih ni mah se club hotuten Giggs ai hian Louis van Gaal an duh zawk a, season thar atana Jose Mourinho an thlan leh bawk avangin chhuah a thlang ta zawk a ni.

Giggs hian kum 14 a tlinin United academy a zawm a, November 1990-ah kum 17-a upa niin professional player ni ṭanin March 2, 1991-ah first team tana hmasa ber khelin Everton a hmachhawn.