Spain coach a bang dawn

European Championship 2016-a Italy hneh loa an tlak hnuah Spain manager Vicente del Bosque chuan a hna thawh chhunzawm a tum loh thu a sawi chhuak.

Kum 65-a upa Bosque hian 2008 khan Luis Aragones thlakin Spain hi a enkawl ṭan a, an ram chanchina a vawi khat nan 2010 World Cup-ah a champion pui. La Roja hi Euro 2012-ah hlawhtlinpui lehin Champions League-a Real Madrid vawi hnih champion pui tuin an ram a hlawhltinpui leh avangin Spain mipui-in an ngaisang a - khawvelin a fak.

Mahse, beisei angin thil a kal reng lo. World Cup 2014-ah khan group stage-ah Netherlands leh Chile te hneh loin knockout round an lut phak lo. Real Madrid coach hlui hian a hna bansan tum mah se Spanish Football Federation lamin an chelh chhunzawm.

Euro 2016 a lo herchhuak a, France-ah player ṭha rual hruai chung-in Group D-ah Czech Republic leh Turkey te hneh mah se Croatia an hneh lo a, last 16 lut tho mah se Italy lakah 2-0 in an mualpho.

A hna chawlhsan a tum thu sawiin Bosque chuan, "Coach nih chhunzawm tumna ka nei tawh lo. Euro result vang a ni lo a, ka hmalam hun turah chuan ka lungngai lem lo," a ti.

Euro 2016-ah khan Bosque hian Iker Casillas chu hruai ve mah se Manchester United keeper David De Gea a ring zawk. Porto keeper hi a dinhmunah a lawm lo a - coach nen an inkar a ṭha lo chhunzawm.

Bosque-a'n a ban tur hi a player hruaite zawng zawng a hrilh vek, Casillas tiam lohin! Keeper nen an boruak sawi chhuakin, "A teammate-te nen chuan an boruak a ṭha a, mahse coaching staff-te nen erawh a ṭha lo. Ka chungah a lawm lo a, Javier Minano leh Toni Grande chungah pawh a lawm chuang lo, hei hi ka hma hun ka hrilh ve loh chhan chu a ni," tiin physical trainer leh assistant coach chungah pawh Casillas a lawm loh thu a sawi.

A naupan lai aṭanga a hriat tawh player chungchang sawi chhunzawmin, "Casillas hi kum kaw mi a nih lai aṭang tawha ka hriat a ni a, ram tan match 167 zet a khel thei hi a chhuanawm. A sulhnu ropui hi inkhel pathum vel vang lek a tihchhiat chi a ni lo," tiin hun rei tak a lo enkawl tawh lakah rilru chhia a pu lo tih a sawi tel bawk.