Italy hmaa khûr Germany an vannei

German pa rothap leh captain Bastian Schweinsteiger-a penalty pet tur hmel enin Germany an hlauthawng takzet tih a chiang - a tawpah an vannei ta hram!

Inrinni zan khan Germany-in penalty vawi thum an hlah a, an khingpui Italy lamin an la hlah hnem zawk miau avangin Die Mannschaft-in tun hmaa inelna liana an la hneh ngai loh Azzurri hnehin European Championship 2016-ah semifinal an lut.

Stade de Bordeaux-a inkhel hi final tluk hiala chhal ni mah se team pahnih an fimkhur avangin inkhel ṭantirh lam a nung tawk lo. Minute 65-naah Mesut Ozil-a'n world champion hmahruaina goal a khung a, Italy-in Jerome Boateng ât thut vanga handball vangin minute 78-naah Leonardo Bonucci penalty hmangin an sut a. Extra time thlenga goal dang luh belh tawh loin penalty shootout-ah Germany 6-5 in an vannei.

Low a fimkhur

Antonio Conte kaihhruai Italy hi kum 50 chhunga Azzurri team chhe ber ang hiala sawi an awm. Midfielder ṭha Claudio Marchisio leh Marco Verratti te inhliam vanga an tel loh bawk avangin Italy hian rin an hlawh lo lehzual.

Nimahsela Belgium, Sweden leh champion lai Spain an hneh hnuah Azzurri an hmuh dan a dang a, world champion hmachhawn tur hian Daniele De Rossi leh Antonio Candreva te an inhliam bakah hrem vanga Thiago Motta a khel thei loh avangin Italy ṭha ber an ni lo.

Hliam tuar Italy ni mah se Ger-many tan chuan inelna liana ṭum riat an hneh theih loh kha an la ni reng. Germany boss Joachim Low- a fimkhur a, Slovakia an khelh ṭuma man of the match Julian Draxler tan hmun a awm loh ṭangin chu chu a hmuh theih. Hei mai hi a ni lo, German boss hian khelh dan thar (Italy khelh dan?) a rawn chhawp chhuak bawk.

Conte-a'n Juventus defender pathum Giorgio Chiellini, Bonucci leh Andrea Barzagli te tlarhnungah a rem a, Low-a'n midfielder Draxler thlaktu Benedikt Howedes chu Boateng leh Mats Hummels-te nen defence laiah a dah a, Jonas Hector leh Joshua Kimmich-te chu wing back an ni. Tlarhmaah Mario Gomez kawppui turin Thomas Muller a tawlh hma a, an hnungah Mesut Ozil a awm bawk.

Italy lamin inhliam De Rossi aiah Juve midfielder Stefano Sturaro an luhtir a, Conte erawhin an khelh dan an thlak ve lo a, amaherawhchu Sturaro hian field chhungah Marco Parolo aiawhin Lazio midfielder Parolo hian De Rossi hmunruak a luah thung.

Tactical battle

Team ṭha zawka ngaih Germany-in an nawr ngam lo a, Italy-in ball sem thiam Ozil leh Toni Kross te an dah bo bawk avangin Die Mannschaft an hmuhnawm lo. Azzurri pawh chuti tho - Spain an khelh ṭuma an nawr angin an nawr let thei lo a, Germany tlarhnung an khawng tlat.

Minute 16-naah Sami Khedira inhliam vangin Germany captain Bastian Schweinsteiger a rawn inlan a, Manchester United midfielder hian danglamna a thlen thei bik lo. Team pahnih hi goal kick aṭangin an inveng ṭan a, chak loh hlau inkhel a ni a, goal thun tuma innawr angin a hmuhnawm tawk lo.

Goal chance erawh a awm tho a, tihsual vanga Germany chance neih chu Muller-a'n Italian keeper Gianluigi Buffon tan harsatna a siam thei lo. Italy lamin Kimmich vanga German tlarhnung offside trap siam sual chu Eder hmangin an goal-ah an chantir teuh hle.

A goal mial!

First half-ah Germany midfiel-der ten ball an sem theih loh avangin ball an vawrh a nasa a, second half-ah erawh insiamṭha hretin Kroos-a hmel hmuh tur a awm ṭan.

Striker palian Gomez-a'n vei lam aṭangin Hector-a tan ball fing a pe a, German left back cross hi Ozil chuan Buffon-a dan rual loin a pet goal.

Germany game a ṭha chho a, goal khungtu Ozil-a killer pass chu Gomez-a pet hmain Juve defender Chiellini -a'n an goal lamah a tlawh a, Azzurri-in goal-ah veteran keeper Buffon an nei hlauh.

Inhliam vangin Gomez aiah Draxler a inlan a, Germany buaina erawh Bayern Munich defender Boateng a ni - box chhungah a hand ball hlau. Defender ten an kut an dah bo ṭhin laiin Boateng erawhin a kut a phar a, penalty a chawi. Minute 72-naah Bonucci-a'n Neuer-a ban phak loah a dah a, 1-1 a ni.

Italy-in penalty pet pawi an ti lo tih an khelh dan hmangin an lantir zui a, Germany-in goal an nawr na si lo a, goal hlauhawm a tlem. Inkhel erawh tihsual hleka chak zawk awm theihna a nih tawh avangin a hmuhnawmna a nep lo.

Hlauhthawnna

Antonio Conte-a'n hun tawp hma chiahin penalty pet turin Simone Zaza a luhtir a, Juventus striker hian field chhunga second 30 a awm chhungin ball a khawih hman lo.

Germnany hi FIFA World Cup-a penalty vawi li an pet tawhah an la chak vek a, penalty hmanga an chak loh hnuhnung ber chu Euro 1976 niin final-ah Czechoslovakia an hneh lo.

Penalty pet hmasa bertu substitute Lorenzo Insigne-a'n cool takin Italy tan a khung a, Kroos-a'n a sût. Penalty pet tura thun luh Zaza a rawn inlan a, inringtawk awm takin sawt vel phawt mah se goal chungah a pet.

Hun pawimawhah Muller rawn pen chhuakin Buffon-a en chungin a pet a, Bayern forward a zam laiin a penalty pet dangtu Buffon erawh a fim ṭha hle.

Italy defender ṭha Barzagli-a'n a khung zui a, Slovakia laka penalty hlahtu Ozil-a'n goal ban a pet per leh bawk. Graziano Pelle-a'n inrintawkna a nei lo a, goal zawnah a pet thei lo a, player hmuhnawm Draxler-a'n a rawn khung leh si avangin vawi li petah 2-2 a ni.

Hun pangngaia penalty pet goal-tu Bonucci-a'n a hlah a, Germany chak thei an ni. Schweinsteiger rawn pet chhuakin captain armband hrengtu hi a zam em avangin German mipui beiseina a tihlawhtling thei lo.

Sudden death-ah Emanuele Giaccherini, Marco Parolo leh Mattia De Sciglio ten Italy tan an pet goal a, Matteo Darmian pet erawh Neuer-a'n a dang. Premier League player zingah pet goal an awm lo a, Germany lam tan Mats Hummels, Joshua Kimmich, Jerome Boateng leh Jonas Hector ten pet goalin hnehna an chang.

Hun pangngnaia tisual Boateng-a'n a huaisenna a rawn lantir a, goal khung lo se chak lo theia an din laiin goal kilah tak a pet lut. Chakna goal khungtu Hector-a pet erawh Buffon-a'n a petna lam a ring dik a, Italian keeper hian a chhuah tho.

Eng nge an sawi?

Italy coach Antonio Conte chuan, "Germany khan an khelh dan an thlak a, Italy kha an zah hlein ka hria. Kan team hian theihtawp kan chhuah chuan kawng a awm a ni tih kan lantir a, kan tlak dan erawh a lungchhiatthlak a ni. Ṭantirh aṭanga khup hliam chunga khel Sturaro inpekna kha ka theihngilh ngai lo ang. Football hian hlimna min pe a, hreawmna a keng tel bawk. Kum hnih chhung kan theihna zawng zawng kan chhuah hnuah kan ram kan pan dawn a, Euro 2016 kan hman dan hi a ropui a ni. Ka tana hlawhtlinna chu heng player huaisen rual ka enkawl thei hi a ni a, ka tan engkim an hlan a ni," tiin a player-te a fak.

Germany manager Joachim Low chuan, "Team pahnih awmze nei takin kan innawr a, lemchan hmuhnawm tak a ni a, penalty kha a ngaihnawm lehzual. Kan vannei a ni. Ka naute khelh danah sawiselna ka hre lo a, minute 120 chhung khan team ṭha zawk kan ni. Penalty-ah khan tawnhriat nei zawkin an hlah a, naupang rualin an pet goal thung," tiin inkhel chungchang a sawi.

Die Mannschaft hian June 7, Ningani zan hian nizana inkhel France leh Iceland chak zawk nen semifinal an khel dawn a, hrem vangin Hummels a inlan ve thei lo ang.