Djokovic tan Wimbledon a tawp

Novak Djokovic chu Wimble-don 2016 aṭanga vuak thlak a ni! Court 1-ah ruah sur vanga ṭum thum ngawt inkhel a khaihlak hnuah world number 1 hi seeded 28-na Sam Querrey lakah darkar hnih leh minute 56 chhungin 7-6, 6-1, 3-6, 7-6 in a chak lo.

Grand Slam vawi 12 cham-pion tawh Djokovic hian tun dinhmunah major tournament nomawi a kawl khawm vek. Mah se season khat chhunga major tournament pali a champion kim thei Rod Laver (1969) record erawh a nih rual thei rih dawn ta lo.

Season hmasa French Open final-ah Djokovic hi Wawrinka lakah a chak lo a, hemi hnuah Grand Slam-a a chak loh lehna hmsa ber a ni. Kuminah nikuma a hlawhchhamna Roland Garros-ah hlawhtling tawh mah se khawvela tennis tournament upa bera a nomawi kawl lai a hloh avangin Laver-a ropuina ang a khum ve theih loh phah.

Buaina karah

Zirtawpni zan Wimbledon third round inkhelah champion lai Djokovic chu service nei
ṭha chungchuang Querrey lakah a talbuai hle - Serbian tlangval hian set hmasa pahnih a hloh nghal phawt a, ruah sur vangin inkhelh tihtawp lailawk zui a ni.

Inrinni zan khan set thumna aṭangin khelh chhunzawm a ni a, kum 29-a upa Djokovic-a'n tlawm mai a tum loh zia lantirin minute 16 chhung lekin 4-0 in hma a hruai nghal - ruah sur vang bawkin inkhel an ti tawp leh rih.

Inkhel an ṭan leh hnuah Djokovic-a'n set thumna la ve mah se set hnuhnung bera Querrey-a'n 6-5 a hma hruai laiin ruah sur vang bawkin an chawlh leh. Rei lote hnuah lo kir lehin kum 28-a upa Querrey-a'n tie break hmangin hnehna a chang zui.

Eng nge an sawi?

Djokovic hneh tura a service vawi thum chuhsak theitu Quer-rey chuan, "Awih a har zawk hial! Wimbledon a nih avang hian a dang lam a, a hluin ka hlim takzet a ni. Break point a hmuh hnuah ace ka siam leh hlauh ṭhin a, ka vanneih phah," tiin vawi 31 teh meuh ace a siam chu a chak chhan pakhat niin a sawi.

A zawna kum hnih a cham-pion-na hmuna chak ta lo Djokovic chuan, "Sam khan hnehna chan phu khawin a khel ṭha a, a service a ṭhat em avangin chhuhsak a harsa hle. Ka khel
ṭha lo a, ball ka duhnaah ka vuak theih loh bakah tihsual ka ngah bawk" tiin kum 2009 hnua Grand Slam tournament-a quarterfinal a luh zawh loh lehna hmasa ber inkhel chungchang a sawi.

Djokovic chuan sawi zelin, "Ka hmalam hun hi a thim zawngin ka thlir ngai lo a, tennis chauh ni loin chhungkua ka neih avangin rilru tih hahdamna tur ka nei bawk. Tunah chuan ṭha zawka inkhel thei leh tura rilru sen a ngai," tiin a sawi.

Inkhel Thlirna Tawi

Djokovic Stats Querrey

7 Aces 31

2 Double Faults 2

97/146 (66%) First Serve % in 100/160 (63%)

27/37 (73%) Net Points Won 26/42 (62%)

3/17 (18%) Break Points Won 4/15 (27%)

34 Winners 56

31 Unforced Errors 52

146 Total Points Won 160