Wimbledon Federer leh Murray chak laiin Wawrinka chak lo
Grand Slam pali zinga an ngaihhlut ber tih ngam Wimbledon 2016 a hmuhnawm zel. Vawi sarih champion tawh Roger Federer leh khawtual tlangval Andy Murray te hmalam pana kal zelin last 16 an lut - seeded palina Stan Wawrinka erawh Juan Martin del Potro lakah a chak lo thung.
Zirtawpni zan khan Centre Court-ah seeded pathumna Federer chuan khawtual tlangval Dan Evans chu 6-4, 6-2, 6-2 in a hneh. Wimbledon hi chawlhkar hnih khelh ṭhin a ni a, tun ṭum hi Grand Slam vawi 17 champion tawh Federer-a'n chawlhkar khatna a paltlang ṭum 14-na chiah a ni.
Kumin Wimbledon match thuma khelh aṭanga set la hloh miah lo Federer chuan, "Ka kum tam deuh tawh a, a rei lo thei ang bera hnehna chan theih hi ka tan duhthusam a ni. Set nga inkhelh ngai loa ka kal tluang hi ka lawm hle, chawlh nei mang loa inkhelh a ngaih chuan a harsa ṭhin," tiin a sawi.
Inrinni zan khan Britain number 1 Murray pawhin harsatna lian tham tawk loin third round-ah John Millman chu 6-3, 7-5, 6-2 in a hneh ve bawk. Grand Slam vawi hnih champion tawh Murray hian hnehna chang turin darkar hnih leh minute 10 chiah hun a hmang.
Kum 29-a upa Murray chuan, "John khan unforced error a nei khat hle a, kan inkhelh chhung zawng khan inthlah dulna hun min siam sak lo. Inkhel zawng zawngah nuamsa taka hnehna chan mai theih a ni lo a, dawhthei taka nghah a ngaih chang pawh a awm ṭhin," tiin Australia tlangval chu awlsam taka a hneh bik loh thu a sawi.
Inkhel dangah 2014 Australian Open hnuah a ban rek na vangin a inkhel mumal lo Argentina tlangval Del Potro hi tun dinhmunah ATP ranking-ah 165 daih a ni. Mahse, a banrek na a dam hnuah player ṭha a la nih zia kan hmu leh ta - Del Potro hian season hmasa French Open champion Wawrinka chu 3-6, 6-3, 7-6, 6-3 a hnehin third round a inhlangkai.
Beiseiawm pathum
Hmeichhe single-ah Angelique Kerber, Agineska Radwanska leh Simona Halep te an khel ṭha tluang a, fourth round an inhlangkai thei vek.
Australian Open champion lai Kerber chuan a German pui Carina Witthoeft lakah darkar khat chuang deuh hretah 7-6, 6-1 in hnehna a chang. Seeded palina Kerber hian kum 2012-a semifinal a lo luh tawhna hmun Wimbledon-ah kumin hian beisei a nei sang ve leh hle.
2012 Wimbledon runner up Radwanska a khel ṭha tual tual. Kum 29-a upa Katerina Siniakova chu 6-3 6-1 a hnehin last 16 lut tur hian minute 63 chauh hun a hmang nghe nghe.
Player ṭha tak ni chunga Grand Slam-a la hlawhtling thei lo Halep pawhin hmalam a pan ve hret hret zel - Romanian star hian Dutch player Kiki Bertens chu 6-4, 6-3 in a hneh a, 2014 French Open final hnua a vawi khat nana major tournament final lut turin kawng dik a zawh mek.
Hetih mek lai hian Wimbledon vawi hnih champion tawh Petra Kvitova erawh Ekaterina Makarova lakah 7-5, 7-6 in a chak lo. Second round inkhelah hian seeded 10-na Kvitova hian vawi 43 zet unforced error neiin a khelh fuh loh ni a ni tih a chiang - world number 53 laka minute 53 chhung chauha a chak lo nghal hi a mak hran lo.