Lacazette-a'n Lyon chhuahsan dawn lo

Lyon president Jean-Michel Aulas chuan tun hnaia chhuak tur anga sawi an striker Alexandre Lacazette chu a chhuah loh tur thu a sawi a, French striker beiseitu nia sawi West Ham leh Arsenal tan chuan thil hriat nuam a ni hauh lo ang.

Hammers-in sum tam tham taka lakluh an tum nia an sawi Lacazette hian season hman zawh takah khan inelna hrang hrangah goal 23 zet a khung a, heti chung hian Euro 2016 khel mek France squad-ah erawh koh a ni lo.

Lyon president Aulas chuan, "Alexandre lakluh tuma min dawrtu tam tak an awm a, mah se a chhuak lo ang. Thutlukna hi ama duhthlanna a ni a, coach Bruno Genesio pawhin a chungah rinna a nghat lian hle a ni," a ti.

Lacazette unaupa leh a advisor ni bawk Benoit Lacazette chuan a unaupa hian Paris Saint-Germain pan a duh niin tun hnaiah a sawi a, mah se Lyon president ber a ṭawng chhuah takah chuan season tharah pawh Lacazette hian club thar a nei dawn chuang lo niin a lang.