Hmasawn tum Joel Matip

Liverpool defender thar Joel Matip chuan Premier League-a hmasawn zel tura a inpuahchah thu a sawi a, chumi tur chuan a fitness chu a ngaihpawimawh ber a nih thu a sawi nghal bawk.

German Bundesliga club Schalke aṭanga Reds pantu defender chuan, "Premier League khel tur hian ka inpeih tawh a, mah se ka taksa lamah tun aia hmasawn zawk ka mamawh a ni. Bundesliga nena khaikhin chuan league hran daih a ni a, tharum a ngaih hnem avangin ka taksa tilian turin tun aia nasa zawka ka beih a ṭul a ni," a ti.

Kum 24-a upa defender chuan sawi chhunzawmin, "Bundesliga hi league hautak tak a ni a, chutihrual chuan Premier League pawh hi a level-a sang tih ka hria, mah se he hmuna khel tur hian ka ṭha tawk a ni," tiin inrintawkna a nei sang hle.

Cameroon tana vawi 27 inlan tawh Matip hian professional football a luhchilh hnuah Schalke 04 lo chu club dang a la nei ngai lo a, Liverpool hi a club pahnihna tur chauh niin season hman zawh tak rual khan a contract a tawp avangin free transfer-in Anfield hi a pan a ni.