Hlauh nei lo Wales an kal zel

Wales manager Chris Coleman chuan, "Kum li liam ta lawkah kha chuan vawiina kan dinhmun hi suangtuah ngam chi a ni lo," tiin a sawi a, hei hian Wales Euro 2016 zinkawng thui takin a hrilhfiah.

Inrinni zan khan Gareth Bale-a te ram Wales chuan champion rin-kai zinga mi Belgium chu quarterfinal-ah 3-1 in an barakhaih a, Euro 2016 nomawi chawi turin vawi hnih chak chiah an mamawh ta.

Inkhel hmuhnawm

Inkhel ṭantirh lamah Wales an talbuai a, minute 13-na lekah Bel-gium tan Radja Nainggolan chuan yard 25 vela hla aṭangin goal ropui a khung. Mahse, Wales an talbuai rei duh lo. Minute 30-naah dar hliam nei chunga inlan Ashley Williams a lo lang a, Wales captain hian Aaron Ramsey corner aṭanga ball lokal chu an si phurh sutna ni turin a tauh lut.

Team pahnih an inngam tawk a, goal khung tuma an innawr tawn zak zak hnuah goal dang khung loin chawlhlawk an hmang. Minute 55-na a ni a, goal ropui leh danglam bik kan hmu. Club khelhna nei loa awm mek striker Hal Robson-Kanu chuan Wales goal hnihna a khung a, goal hlu leh mawi bik a ni.

Belgium-in an si phurh sut ngei an tum a, mah se Wales tlarhnung inremkhawm ṭha tak an paltlang hleithei lo. Hun tawp nan minute nga chiah a awm tawh tihin goal mamawh zawk Belgium bawkin goal an chhuah leh a, substitute Sam Vokes chuan Wales chak nemngheh nan an goal thumna a khung - Belgium tan goal dang khungna hun a awm tawh lo a, Wales-in semifinal an lut.

I hriat loh Kanu!

Wales leh Belgium inhma-chhawn hmaa Marc Wilmots-a ngaihtuahna tibuaitu ber chu Gareth Bale a nih ngei a rinawm - mah se, hriat loh kar aṭangin Robson-Kanu a inlar a, group stage-a Slovakia nen an inhmachhawn ṭuma chakna goal khungtu hian goal a khung bakah Belgium tlarhnung a chhaih mangang ngun hle.

Aaron Ramsey-a'n ball a siamsak hnuah kum 27-a upa striker hian 'Cruyff Turn' pholangin mawi taka Belgium tlarhnung a bum hnuah goal a khung a, a goal khung dan ngaihtuah chuan Championship club Reading-in duh loin an chhuah zalen tih hi thil awih har tak a ni.

Gareth Bale-a'n goal khung lo mah se inkhelh chhung zawngin a thawkrim a, Wales chakna hnar a ni. Wales tana thu lawmawm lo erawh yellow card pahnihna chawi avanga Arsenal midfielder Ramsey leh Tottenham Hotspur defender Ben Davies ten semifinal-a Por-tugal an hmachhawn thei lo tur hi a ni ngei ang.

Zam ngai lo Coleman!

Wales manager Chris Coleman chuan, "Rim taka i thawh a, suangtuahna ropui tak neih i hlau lo a nih chuan hlawhchham pawh i hlau lo tihna a ni. Hlawhchham nih hi ka hlau ngai lo a, mi zawng zawngin hetiang hun harsa chu an tawng vek. Hlawhtlinna ka chhar aiin hlawhchhamna ka tawn a tam zawk," tiin tun dinhmun thleng tura huaisen taka a beih thu a sawi.

Player a nih laia Wales tana vawi 32 inlan thei Coleman chuan sawi chhunzawmin, "Kan inkhelh hma khan France-ah hian intihlim tur ni loin inelna hmachhawn tura kal kan nih thu ka sawi a, sipai ang maiin kan tlarhnung kha an ding khawng a ni. Ka tih theih awmchhun chu ka player-te hnenah semifinal thleng tura kan thawhrimna hrilh nawn fo hi a ni a, eng team lakah pawh ṭha taka khel turin kan ṭha tawk a ni," tiin a naute chu a chhuang hle.