Ronaldo awm lo mah se Jota a awm

Portugal-in captain Cristiano Ronaldo chhawr thei lo mah se Sweden hneh turin harsatna an tawk lo. Estadio Jose Alvalade, Lisbon-a inkhelah Bernardo Silva-a'n goal hmahruai a khung a, Diogo Jota siamsak a ni. Liverpool forward Jota hian goal hnih a khung zui a, Portugal 3-0 in an chak.

Portugal leh Sweden inkhel en châkawmna chu Ronaldo a ni a, Juventus forward hian ram tan goal 101 khung tawhin record siam turin goal kua chiah a mamawh tawh.

Amaherawhchu vanduai thlak takin France nena an inhnehtawk zawhah Ronaldo hi Covid-19 positive a ni tih hriatchhuah a ni a, Sweden nen a inlan thei lo.

Defender tawnhriat nei ṭha Pepe-a'n captain armband a hreng a, Ronaldo awm lo mah se Portugal-in player beiseiawm tak tak an kawl avangin ṭan phat aṭangin an game a nung nghal. Diogo Jota an kawl avangin Sweden nen Ronaldo awm kher an mamawh lo.

Minute khat pawh tling loah Jota-a'n Sweden tlarhnung a chhaih buai nghal a, a ball pet chu goal pawnah chiah a kal. Man City wing back Cancelo cross chu William Carvalho-a'n hnai tak aṭangin goal ban a tauh ber.

Minute 21-naah Diogo Jota a rawn lang a, Bruno Fernandes aṭanga a ball hmuh chu mahni hmasialna nei loin Bernando Silva tan a pe. Manchester City midfielder Silva hian mawi zetin a pet goal. 

First half tawp hmain Liverpool forward Diogo Jota-a'n box chhungah ball ṭha hmuin ṭha zetin a pet goal. Sweden-in siphurh sut ṭhenna hun ṭha nei mah se Marcus Berg-a'n hnai tak aṭangin a pet over.

Second half-ah Rui Patricio-a'n hna a ngah hret a, Wolves keeper-in Portugal tan hna ṭha tak a thawk. Atletico Madrid forward Joao Felix-a'n keeper chauh a hmachhawn hnuah a pet goal thei lo a, Diogo Jota-a'n goal khung dan tur a takin a rawn zirtir.

Jota hian minute 72-naah mual vei lam aṭanga ball lalutin goal ṭha bik a khung. Tlarhnungah keeper Rui Patricio a chet ṭha a, Alexander Isak tauh luh tur ṭha taka a dan zui avangin Portugal 3-0 in an chak.

Portugal forward Diogo Jota chuan, "Ka tan chuan zan duhawm a ni a, ka career-a ka khelh ṭhat ber a ni. Ram tan a vawi hnih nan ka inlan a, Sweden 3-0 a kan hneh thei hi ka lawm hle," tiin a sawi.

UEFA Nations League champion lai hian an mualah match 20 chhung hneh loh an tawng tawh lo a, Nations League-ah match 10 khel tawhin chak loh (W7 D3) an la nei lo.