France-in Croatia an hneh nawn

FIFA World Cup 2018 final rematch-ah France-in mualneitu Croatia 2-0 in an hneh. Stadion Maksimir, Zagreb-a inkhelah Les Bleus tana Antoine Griezmann goal khung chu Nikola Vlasic hmangin Croatia-in an sut a, Didier Deschamps-a hote tan Kylian Mbappe-a'n chakna goal a khung.

League A group 3-ah France-in point 10 an hmu a, Portugal nen an point hmuh zat a inang. Croatia erawhin ṭum khat Sweden an hneh bak chak an la nei lo a, pathumnaah awm mah se point thum chauh an la hmu.

France-in goal khung tur hun an mamawh rei lo a, minute 8-naah Antoine Griezmann-a'n a ke zawna ball tla fuh chu kawh zetin a pet goal a, player class sang danglamna a lang.

PSG forward Kylian Mbappe-a'n goal hnihna khung theihna hun ṭha a nei a, Anthony Martial ball pass ṭha zet chu goal ruakah a pet goal. Croatia-in insiamṭhatna hun an nei. Luka Modric-a telna team an insiamrem a, mualneituin inkhel an thunun ta zawk.

Croatia-in first half-ah an siphurh sut thei lo mah se an phu ang ngeiin minute 64-naah Nikola Vlasic goal hmangin siphurh an sut. Vlasic hian Josip Brekalo aṭanga a ball hmu chu box chhung aṭangin rang zetin a pet goal.

Paul Pogba luh hnuah France inkhel a nung a, hun tawp lamah mikhual an che ṭha. Minute 79-naah Pogba ball vawrhluh chu Lucas Digne-a'n vawi khatah pet nghalin Mbappe tan harsa tur a awm tawh lo.

Hun tawp dawn hnaiah France captain Hugo Lloris-a'n Mateo Kovacic leh Andrej Kramaric te goal khung tur a dang a, 2-1 in hnehna a chang.

France coach Didier Deschamps chuan, "A harsa dawn tih kan hria a, bul kan ṭha thung. Goal hnih kan khung nghal loh avangin kan hna a harsa a, a tawpah erawh kan duh tak point thum kan hlawh chhuak," tiin a sawi.

Croatia-in Les Bleus vawi riat an hmachhawn tawhah chak an la nei lo a, vawi ruk chak loin vwi hnih dangah an inhnehtawk. Chutihrualin Croatia hi an muala match hnuhnung 20-a an chak lohna hmasa ber a ni.