James-a'n LA a pan chhan chu basketball

Hlimhlawp bawlna hmun pui tiin an sawi ṭhin, film chan thiam leh zai thiam vanga khawvel deng chhuaktu tam takte tual chaina hmun chu 'Los Angeles' a ni. LA kawpuia innghat Los Angeles Lakers chu NBA 2020 champion an ni a, an thiampuipa chu LeBron James a ni.

LeBron James-a'n Lakers a pan dawn khan mi tam tak chuan, "Basketball vang a ni lo, film leh thil dangah a hmingṭhatna belhchhah duh vang mai a ni," tiin an sawisel nasa hle, khatih hun laia Lakers dinhmun thlir chuan sawiseltute ngaihdan hi a mak hran lo.

Hun rei tak chhung chu Lakers hian nomawi an chawi tawh lo a, playoff khelh pawh thil harsa a tling hman hial! Team tlachhe angreng tak an nih avangin James-a'n a zawm duh khan mak tih a hlawh a, tunah erawh an thil tum chu a rawn par chhuak ta.

Nomawi an chawi hnuah James chuan, "Lakers ka zawm chhan chu club ropui an nihna lan chhuahtir leh a ni," tiin a sawi. NBA Finals-ah hian a vawi li nan Most Valuable Player atan thlan a ni bawk.

Cleveland Cavaliers tana contract a hman zawh hnuah James kha 'free agent' a ni a, a duh lam a hawi thei. 2018 khan kum 33 mi ni tawh mah se a theihna a la sang tawk a, a nihna takah chuan a club zawm tur chu duh a la thang thei.

2017-18 season Western Conference lamah 11-na dinhmun luahtu, playoff pawh khel phak lo Los Angeles Lakers chuan James hi an lalut mauh mai. Season li chhung atan contract an ziak a, an inremna chu dollar maktaduai 154 (Rs 11,28,36,57,000) a tling hial.

Miami Heat leh Cleveland Cavaliers tana NBA nomawi chawi tawh American star hian Lakers a zawm tirhah an duh ang a thlen nghal vek bik lo, season hmasa khan 10-na an ni phak ṭawk, an ropui teh chiam lo.

James an nei tawh a, season ṭan dawn khan Anthony Davis an neih belh bawk. New Orleans Pelicans aṭanga an lakluh forward hi 6 ft 10 in zeta sang a ni a, a kawppui tur James hi 6 ft 9 in a ni thung, hmuphurhawm tak an ni.

American star pahnih hian an thiam thil ropui tak tak hmangin Lakers chu season 10 hnua a vawi khat nan conference champion an ni pui a, an la duh tawk mai lo. NBA champion ni turin Miami Heat chu an hneh zui leh bawk.

Basketball-ah chuan player ṭha fal pakhat neih pawhin team a siam danglam dawrh thei a, a ṭha pahnih James leh Davis te an inkawp meuh chuan midang tan dan theih an ni tawh lo. Lakers lamin sum tam tak an hman ngam chhan chu a behbawm ni loin NBA nomawi duh vang a nih zia a lang.

Basketball player zingah tu nge ropui ber? tih zawhna hi inzawt ta ila, a tam ber chu 'Michael Jordan' tia an chhan ngei a rinawm. Jordan khel lai hmu phak lem lo pawhin a chanchin an hriat leh an en let aṭangin a ropui zia an hria.

Jordan hi tuma elphak loha ngaih a ni a, mahse tunah zet chuan James hian a dinhmun hi a chuh phak ṭana ngaih a ni. NBA champion vawi li a nih bakah Finals MVP ṭum li a ni tawh bawk, inkhel pawimawh leh boruak sanga che ṭha ṭhin a nih avangin James hi dah hniam theih a ni bik lo.

James hian NBA hi season 17 chhung a chamchilh tawh a, kum 35 mi a nih hnuah pawh midang chunga leng a la ni thei. Cavs, Heat leh Lakers tana nomawi chawi theitu hian NBA title emaw, mimal chawimawina lian emaw a lak belh tawh lo a nih pawhin mi tam tak chuan NBA player ropui berah an ngai kumkhua tawh ang.