July 14-ah MFA Super Cup tan dawn
Mizoram Football Asso-ciation buatsaih Mizoram pum huapa affiliated club-te inelna MFA Super Cup-ah team 66 an inziak lut. Rs 1,50,000 inchuhna hi July 14 khian Lammual leh RG Stadium-ah khelh ṭan a ni ang.
MFA Super Cup?
MFA Super Cup vawi thum khelh a ni tawh a, tun hma chuan MPL champion leh knockout inelna (MFA Cup/I Day Football) champion te an inhmachhawn
ṭhin. Chanmari FC-in nomawi vawi hnih an chawi tawh a, Bethlehem Vengthlang FC chu champion lai an ni.
Tun ṭumah erawh match khat chauh a ni tawh dawn lo a, kalphung thar a nih avangin champion team hian Mizoram football history-ah hmun pawimawh a chang dawn. District FA hnuaia club-te'n first round aṭangin an khel ṭan ang a, MPL club pariatte chu round of 16 aṭangin an khel ṭan thung ang.
Champion hian Rs 1,50,000 leh 'nopui' an dawng ang a, inelna ṭan
aṭangin match tina chak zawk hian Rs 1,000 an dawng ang.
Police an kal zel!
Mizoram Premier League aṭanga an relegate hnuah Mizoram Police chu Aizawl DFA hnuaia first division club an ni tawh a, MFA Super Cup hi MPL club hmaa an theihna lan chhuahtirna remchang a nih avangin inbuatsaihna pawh an nei uluk hle.
Police hian a tikimtu nih an tum lo a, an match hmasa berah Lammuala match hmasa ber khel tur Lungleng Venghnuai FC leh Kawnpui Venglai GSA te chak zawk an hmachhawn ang.
DFA club 58
MFA Super Cup-ah hian DFA hnuaia club 58 an tel a, heng club-te hi group riata ṭhendarh an ni.
Inelna hi knockout a khelh tur niin group champion
ṭheuhte hian last 16 an lut ang. Round of 16-ah hian fixture hi pawh ṭhat a ni dawn a, MPL club te an inhmachhawn nghal dawn lo. Chumi awmzia chu DFA club-te'n MPL club hneh theihna remchang an nei nghal dawn tihna a ni. MFA Super Cup avang hian Aizawlah khelmual âwl a awm hman tawh lo!
Opening Day Fixture
July 14, Ningani
LAMMUAL
12:30 PM Lungleng, Venghnuai FC Vs Kawnpui Venglai GSA
02:00 PM Hming Hming FC, Zemabawk Vs Vulmawi Khawbung
RG STADIUM, MUALPUI
12:30 PM Elim FC, Model Veng Vs Tuidam FC
02:00 PM Zokings Ramhlun N Vs College Veng FC