Wales-in min barakhaih lo - Santos

Portugal coach Fernando Santos chuan Wales-in semifinal an thleng chu mak a tih loh thu a sawi chhuak a, Stade de Lyon-a Nilaini zana final lut tur zawnna an neih tur a thlir lawk nghal bawk.

Euro 2004 finalist Portugal hi kumin inelnaah hian 'draw specialist' hming lem an vuah sak a, kum 61-a upa Santos hote hian minute 90 chhungin Euro 2016-ah hneh an nei lo.

Santos chuan, "Wales hian qualifying-ah Belgium an hneh bakah an draw a, tuna semifinal an thleng hi a mak lo. Coach-in player-te a hrechiang a, an player-te hi England club tana khel deuh vek an nih avangin field chhungah an inhre chiang em em bawk. Team dang nena an danglamna chu field chhungah an theihna zawng zawng an lanchhuahtir ṭhin," tiin a khingpui tur a fak.

Portugal boss hian a khingpui tur team hi fak mah se final thlen erawh a inring zawk tho a, Cristiano Ronaldo leh Gareth Bale te inbeihna ringawt a nih loh tur thu a sawi tel bawk.

Wales-in midfielder pawimawh Aaron Ramsey leh defender Ben Davies te hrem vangin an chhawr thei dawn lo a, Portugal lamah midfielder William Carvalho chiah yellow card vawi hnih hmuh vanga hrem a awm thung.