Stoke-in Nani an ngaihven

Premier League club Stoke City chuan Man-chester United winger hlui Nani an ngaihven thu assistant manager Mark Bowen-a'n a sawi chhuak.

Portugal international hi Euro 2016 khelin a awm mek a, semifinal an luh theihna tura player
ṭangkai niin goal hnih a khung tawh bakah a
ṭhiante khung tur vawi hnih a siamsak tawh bawk a, Spanish club ṭha Valencia chuan lakluh tumin an hel mek bawk a ni.

Kum 29-a upa Nani hian United tan match 147 khel hmanin Champions League-ah a champion bakah Premier League-ah ṭum li a champion pui a, season hmasa khan Turkey lamah a kal.

Fenerbahce forward hi Valencia chuan euro maktaduai 8.5 velin an lalut dawnin lang tawh mah se Stoke hian chan khalh theih an inbeisei.

Stoke assiatant manager Bowen chuan, "Club lian tak Valencia-in an ngaihven tih kan hria, mahse keini pawh kan te bik lo. Coach Mark Hughes-a duhzawng tak a nih bakah tournament ṭha takin a khel mek a, eng nge lo thleng dawn kan hre thuai ang," a ti.

Bowen chuan Nani chuan Premier League a chhuahsan hma hreta a hriat thu a sawi bawkin, "Amah hian a duh a nih phawt chuan English club zingah ngaihventu an awm nual ang," tiin Portugal tana goal 19 khung tawhtu chungchang a sawi.