Delhi Dynamos Coach tur Zambrotta

Indian Super League club Delhi Dynamos chuan season thar aṭang-a an coach ni turin Gianluca Zambrotta an dawr a, Juventus defender hlui hian vawiinah Delhi thlengin tlai lamah chuan Dynamos coach a nih thu puanchhuah hman beisei a ni.

Kum 39-a upa ma-nager hian player a nih laiin khawvel huap club langsar zingah Juventus, Barcelona leh AC Milan tan a khel tawh a, Serie A nomawi vawi thum a chawi tawh. Italy tan vawi 98 inlan tawhin 2006 World Cup nomawi an chawi khan player pawimawh pawl a ni phak.

UEFA Euro 2004 Team of the Tournament, UEFA Team of the Year: 2006, FIFPro World XI: 2006 leh 2006 FIFA World Cup: All-Star Team-ah te lang phakin football khawvelah a mikhual lo hle.

Kum 2013 khan Swiss club Chiasso a zawm a, tlak hlauhthawnawm dinhmuna an din hman hnuin player-manager atan ruat a ni. Swiss second division club hi dinhmun hima a hruai kai hnuah manager pangngai atan lak a ni a, mah se 2015 khan ban a ni leh ta tho a ni.

Hetihlai hian North East United chuan season hmasaa an striker Nicolas Velez chu tun season atan contract an ziahpui leh tawh. River Plate youth system chhuak striker hian ISL-a a season hmasa berah khan vawi 14 inlanin goal nga a khung.