Guardiola pui tur Arteta

Arsenal midfielder hlui Mikel Arteta chuan khelmual chhungah ball pet a tum tawh lo a, season thar aṭangin Manchester City manager thar Pep Guardiola coaching staff zingah a tel dawn.

Kum 34-a upa Arteta hi season liam ta khan hliam vangin a buai hle. Premier League-ah Gunners ma-nager Arsene Wenger-a'n vawi khat mah inkhel bul a ṭantir lo, match kua chu khel ve mah se bench aṭangin a tlan lut vek - league match hnuhnung bera Aston Villa 4-0 a an sawp ṭumin mittui tla chungin Emirates Stadium a chhuahsan nghe nghe.

Barcelona aṭanga in-zir chhuak Arteta hi player a nih laiin Paris St-Germain, Rangers leh Real Sociedad tan te a khelh hnuah England-ah kalin Everton a zawm. Toffees aṭang hian kum 2011 khan Arsenal zawm-in North London club tan hian match 150 a khelh aṭangin goal 17 a khung a, FA Cup-ah ṭum hnih a champion bawk.

Spanish manager Guardiola chuan Man City a enkawl dawn tih a chian hnuah Arteta hi thawhpuia a duh thu a lo sawi tawh, tunah chuan Barcelona enkawl tawhtu duhthusam a thleng dik dawn. City-a chona thar hmachhawn tur Arteta chuan, "Inkhelh ai chuan team enkawl lam hi ka bengverh tawh zawk. Tun hi ka tan hun hlimawm leh duhthusam a ni," tiin Guardiola nen an thawk dun tur chu a nghahhleh thu a sawi.

Kum 34-a upa Arte-ta chuan sawi zelin, ""Emi-rates Stadium-ah khan kum nga hun ka hman chhungin kawng hrang hrangah hma ka sawn nasa hle a, hun liam tate kha engtikah mah ka theihnghilh ngai lo ang," tiin Arsenal a hriat reng thu a sawi.