Conte player lak hmasa ber Batshuayi

Chelsea manager thar Antonio Conte player lakluh hmasa ber ni turin Blues chuan Marseille aṭangin kum 22-a upa Michy Batshuayi an lalut.

Belgium striker hian Stamford Bridge-ah kum nga daih contract a ziak, a man zat tarlan ni lo mah se pound maktaduai 33 vel nia rin a ni.

Juventus, Tottenham, West Ham leh Crystal Palace te pawhin an ngaihven Batshuayi hian season hmasa French Ligue 1-ah Marseille tan goal 17 khungin a ṭhiante goal khung tur vawi kua a siamsak bawk.

Chelsea striker thar hi Euro 2016 Belgium squad-ah telin Romelu Lukaku tluk loin bench tichaktute zinga mi a ni a, Hungary an hneh ṭumin Blues tana a khelh pui tur Eden Hazard siamsak hmangin goal khat a khung. Batshuayi hian Ligue 1-ah hming a chher a, Euro 2016-ah erawh a lansarh hmain Wales hneh loin quarterfinal-ah an tla.

Batshuayi chuan, "Eden Hazard leh Thibaut Courtois ten Blues ṭhatna min hrilh a, coach Antonio Conte a luh bawk avangin a phurawm hle. Europe-a club ṭha berte zinga mi ka zawm thei hi ka lawm a ni," tiin a sawi.

Chelsea striker thar hian an ram Belgium club Standard Liege-ah kum 2011 khan kum 18-a upa niin professional career a ṭan a, Standard tan hian season li chhungin match 120 khelin goal 44 a khung. Kum 2014 nipui lai khan Marseille hi a zawm a, Rennes nen League Cup-a an inhmachhawn
ṭumin bench aṭangin a lut a, a player thlak chu Dimitri Payet a ni.

West Ham tan Payet a che ropui nghal a, Batshuayi hian Marseille fapa rangkachak angin Premier League-ah a hming a chher ve thei ang em tih chu season tharah chhanin a awm ang.