Wimbledon Match 300 chak thei Serena

Grand Slam-a vawi khat hnehna chan pawh thil harsa a nih laiin Serena Williams chuan vawi 300 zet hnehna a chang thei. Pathianni khan World number 1 hian Annika Beck hnehin Wimbledon 2016 third round a paltlang.

Kum 34-a upa Serena hi WTA ranking a number 1 ni thei upa ber ni mah se a la chuai lo tih a chiang - Beck hneh tur pawh hian minute 51 chauh hun hmangin 6-3, 6-0 in hnehna a chang.

Seeded pakhatna Serena hian nizan khan Sloane Ste-phens hnehtu seeded 13-na Svetlana Kuznetsova a hmachhawn zui leh a, result kan hre hman lo thung.

American star Serena hi Grand Slam-ah vawi 21 champion tawhin hmeichhe tennis chanchina hnuhma nei
ṭha berte zinga mi a ni. Mahse, nikum US Open-ah final a lut zo lo a, kumin Australian Open leh French Open final-ah te a chak lo zawkah a
ṭang. Tun dinhmunah major tournament zingah Wimbledon chiah nomawi kawl lai a nei a - hloh a duh tawh lo ang.

Kumin Wimbledon match thum a khelh aṭanga set khat chiah la hlohtu Serena chuan,"History siam hi ka ngaihpawimawh ber a ni hran lo a, hnehna ka chang em tih hi a pawimawh lai chu a ni. Ka service a ṭhain inrintawkna ka nei sang rih hle a, a hlimawm zawnga a tawp ka khar theih tawh ngei pawh ka beisei," a ti.

World number 1 hlui Maria Sharapova chu hrem vangin inlan ve thei lo mah se Russian hmeichhe player an langsar a, Kuznetsova bakah Anastasia Pavlyuchenkova, Ekaterina Makarova leh Elena Vesnina te chuan fourth round an inhlangkai a ni.

Tsonga a chak

Pathiannia Wimbledon mipa single inkhelah Jo-Wilfried Tsonga leh John Isner te an inhnehtawk tak zet a, darkar li leh minute 24 zeta an inhmachhawn hnuah seeded 13-na Tsonga-a'n 6-7 (3-7), 3-6, 7-6 (7-5), 6-2, 19-17 in hnehna a chang. French tlangval Tsonga hian nizan khan a hnampui Richard Gasquet a hmachhawn zui leh.

American Isner hian kum 2010 khan Nicolas Mahut chu set hnuhnung berah 70-68 a hnehin inkhel hautak takah hnehna a lo chang tawh a, kuminah erawh last 16 lur turin a vannei zo ta lo.

Inkhel dangah seeded 15-na Nick Kyrgios chuan 6-3, 6-7, 6-3, 6-4 in Spain tlangval Feliciano Lopez a hneh a, quarterfinal lut tur chuan khawtual tlangval Andy Murray a paltlang a ṭul tawh ang.