Robson Kanu-a'n sawmtu a ngah

Euro 2016 quarter-final-a Belgium laka goal ropui khungtu Wales striker Hal Robson-Kanu chuan club hrang hrang a-
ṭanga sawmtu a ngah thu a sawi chhuak.

Kum 27-a upa striker hian season tawp rual khan Reading-a a conract neih lai chu a tawp a, Championship club hian a contract an pawhsei sak loh avangin tunah hian club nei loin a awm mek. Club lama winger anga khel ṭhin Robson-Kanu chuan, "Khawvel hmun hrang hrang aṭang-in sawmna tam tak ka dawng a ni," tiin Belgium an hneh zawha sawmna a hmuh hnem thu a sawi.

England tana youth level-a lo inlan tawh ṭhin striker chuan sawi chhun-zawmin, "Euro khelh a nih hma pawh khan club ṭha tak tak aṭangin sawmna duhawm ka dawng tawh a, mah se Euro khelh phawt kha ka duh a ni. Premier League khelh ka châk thu hi zep a ṭul lo a, ka khelhna tura hmun ṭha ber a nih chuan ka pan mai ang," tiin season tharah Premier League khelh a tum hmel hle.

Wales manager Chris Coleman pawhin a player chungchang hi sawiin, "Kanu hian sawmtu tam tak a nei dawn tih hi chu thil chiang sa a ni a, a phu pawh a phu a ni. Mahse, Euro khelh hmabak kan la nei tih a hriat a pawimawh a ni," tiin a player chuan tournament pawn lamah rilru a seng nasa ang tih a hlau.

Robson-Kanu hian season hman zawh takah khan Reading tan inelna hrang hrangah match 35 a khel a, goal nga chiah a khung a ni.