Penalty pet tum tawh lo Muller

Euro 2016 quarterfinal-a Italy leh Germany an inhmachhawn ṭuma penalty pet goal lotu German forward Thomas Muller chuan penalty a pet duh tawh loh thu a sawi!

Inrinni zan khan Italy leh Germany-te minute 120 chhung an inhmachhawn hnuah penalty hmanga chak zawk zawn a ni a, German player penalty pet goal lo pathum zingah Muller hi a tel a ni.

Kum 26-a upa forward hian Cham-pions League semifinal-a Atletico Madrid nen an inhmachhawn ṭumin penalty a pet goal tawh lo bawk. Muller chuan, "Kar hnih vel tal chu penalty hi pet tawh loh ka duh a, inzir ṭhat leh phawt ka mamawh a ni. Thla khat emaw thla hnih hnuah erawh penalty pet thiam zawk nichungin ka lokir leh ang," tiin tlawm mai erawh a tum lo hle.

Bayern Munich player ṭangkai chuan sawi chhunzawmin, "Tun dinhmunah chuan a hnunga din a, ka ṭhiante pettir mai ka hnial lo. Mahse, penalty hmanga chak zawk zawn a ngai leh a, team-in min mamawh a nih erawh chuan huaisen takin team tan ka pen chhuak ang," a ti.

Muller-a'n season hman zawh takah Bayern tan inelna hrang hrangah goal 32 khung mah se Euro-ah erawh a team tan goal a la khung lo. Germany tan vawi 76 inlana goal 32 khung tawhtu forward chuan, "Goal khung ngei tumin ka bei zel ang a, ka khung lo chung pawha kan champion a nih pawhin ka lawm ang," tiin team pumpui khelh ṭhat a ngaih pawimawh thu a sawi.